سەرۆککۆماریا سووریەیێ هەلوەستا خوە ل هەمبەری کۆنفەرانسا یەکرێزی و یەکهەلوەستا رۆژئاڤایێ کوردستانێ ئەشکەرە کر.
سەرۆککۆماریا سووریەیێ دیار کر کو ئەو داخویانیێن بانگا فەدەرالیێ دکن ل دژی ناڤەرۆکا پەیمانا هه‌سه‌دێ نه.
کۆنفەرانسا یەکرێزی و یەکهەلوەستا کوردی یا رۆژئاڤایێ کوردستانێ ب سەرپەرشتیا ئه‌نه‌كه‌سێ و په‌یه‌نه‌كێ ب بەشداریا 400 ئه‌ندامان دۆهـ ل باژارێ قامشلۆیێ هات لدارخستن.
د داخویانیێ دە هات تەکەزکرن کو لهەڤکرنا ب سەرکردایەتیا هه‌سه‌دێ رە هاتیە کرن گاڤەکە ئەرێنی یە بەر ب ئارامکرنێ و ڤەکرنا دەریانە ژ بۆ چارەسەریەکە نشتمانی یا گشتی.
سەرۆککۆماریا سووریەیێ ئەشکەرە کر کو د هەمان دەمێن داوی دە داخویانیێن کو ژ سەرکردایەتیا هه‌سه‌دێ دەرکەتنە و بانگ ل فەدەرالیێ دکن، رەوشەکە ڤەقەتاندی ل سەر ئەردێ چێدکن، ئەڤ ب ئاوایەکی زەلال ل دژی ناڤەرۆکا پەیمانێ نە و گەفێ ل یەکیتیا وەلات و سەلامەتیا ئاخا وێ دکن.
د داخویانیێ دە ئاماژە ب وێ یەکێ هات کرن کو یەکیتیا ئاخا سووریەیێ خەتا سۆرە و وها هات گۆتن:
«ت هەولێن سەپاندنا رەوشەکە پارچەکرنێ یان ژی ئاڤاکرنا سازیێن جودا ب ناڤێ فەدەرالی یان ژی رێڤەبەریا خوەسەر بێیی لهەڤکرنا نشتمانی یا گشتی نایێن قەبوولکرن و یەکیتیا ئاخ و گەلێ سووریەیێ خەتا سۆرە و دەرباسبوونا ڤێ یەکێ تێ واتەیا دەرکەتنا ژ رێزا نشتمانی و ئاستەنگکرنا ناسنامەیا هەڤبەشا سووریەیێ”.
سەرۆککۆماریا سووریەیێ هەر وها ئەشکەرە کر کو سەرکردایەتیا هه‌سه‌دێ نکارە ب تەنێ خوە بریارێ ل باکور و رۆژهلاتێ سووریەیێ بدە، ل وێ دەرێ پێکهاتەیێن رەسەن یێن وەکی عەرەب، کورد، مەسیحی و یێن دن ب هەڤ رە دژین.
د بەشەکە دنا داخویانیێ دە ئاماژە ب پەیمانا ئه‌حمه‌د شەرع و مەزلووم عەبدی ژی کر و وها هات گۆتن:
«سەپاندنا بریار ئان دیتنا پێکهاتەیەکە تەنێ و مۆنۆپۆلکرنا نوونەرتیا وێ تێ رەدکرن، ت ئارامی یان ژی پاشەرۆژ بێیی هەڤکاریا راستین و نوونەرتیا دادمەندا ژ بۆ هەموو ئالیان چێنابە.ب دلسۆزی پابەندی پەیمانا ئیمزەکری بن و بەرژەوەندیا نشتمانی یا بلند د سەر بەرژەوەندیێن تەنگ ئان ژییێن دەرڤە رە بگرن.
چارەسەری ل سووریەیێ تەنێ سووریەیا، نشتمانی و گشتییە، ل سەر بنگەها داخوازا گەل و پاراستنا یەکیتیا وەلات و سەروەریا وێ و رەدکرنا هەر جورە سەرپەرشتی یان ژی هەگەمۆنیا دەرڤەیە.”
