بەردەڤکێ ئاک پارتیێ: ئەگەر پەکەکە چەکان دەینە، دێ پێنگاڤێن نوو و ئەرێنی هێن هاڤێتن

بەردەڤکێ پارتیا داد و گەشەپێدانێ (ئاک پارتی) عۆمەر چەلیک راگھاند، ئەگەر پرۆسەیا چەکدانانا پارتیا کارکەرێن کوردستانێ (پەکەکێ) بسەر بکەڤە و ئەنجام بدە، دێ پێنگاڤێن نوو و ئەرێنی هێن هاڤێتن.

عۆمەر چەلیک د داخویانیێن خوە دە ئاماژە کر، ئەڤ پرۆسە ب دەستپێشخەریا سەرۆکێ گشتی یێ پارتیا تەڤگەرا نەتەوەپەرەست (مەھەپێ) دەولەت باخچەلی دەست پێ کریە و ژ ئالیێ سەرۆکۆمار رەجەب تەییب ئەردۆگان ڤە ھاتیە پێشوازیکرن و پشتگریکرن. ل گۆری چەلیک، ئەڤ نێزیکاتی ئێدی وەکی سیاسەتەکا فەرمی یا دەولەتێ تێ دیتن.

بەردەڤکێ ئاک پارتیێ ھەروھا دیار کر، ئارمانجا سەرۆکۆمار ئەردۆگان ژ ڤێ یەکێ، پاراستن و بھێزکرنا دەستکەفتیێن ترکیەیێ یە و ئەڤ یەک دکارە ببە بنگەھەک ژ بۆ ئاڤاکرنا “ئەنیا براتیێ” د ناڤبەرا گەلێن ھەرێمێ دە.

چەلیک دەستنیشان کر، سەرکەفتنا ڤێ پرۆسەیا چەکدانانێ دێ ترکیەیێ ل ھەمبەری ھەر جورە کریزان بپارێزە و د ھەمان دەمێ دە دێ رێ ل بەر بکارئانینا “ھێزێن ب وەکالەت” ل ھەرێمێ بگرە و داویێ ل وان بینە.

بەردەڤکێ ئاک پارتیێ بال کشاند سەر بانگا کو ژ ئیمرالیێ ژ بۆ چەکدانین و خوەھلوەشاندنا پەکەکێ ھاتبوو کرن و گۆت، ئەڤ بانگ نە تەنێ ژ بۆ پەکەکێ، لێ ژ بۆ ھەموو کۆمێن چەکدار و نەیاسایییە.

ھەروھا چەلیک تەکەز کر: “ھەر پێنگاڤەکا بەر ب چەکدانین و خوەھلوەشاندنێ ڤە، دێ ببە زەمین ژ بۆ ئاڤێتنا پێنگاڤێن نوو یێن ئەرێنی.”