حکوومەتا سوورییێ و رووسپیێن دورزیان ل سوەیدایێ ریکەفتن

پارێزگارێ سوەیدایێ راگھاند، پەیمانا کو لگەل رووسپیێن پێکھاتەیا دورزی ھاتیە گرێدان هێژ بەردەوامە و بەندێن وێ دێ ل پەی ھەڤ هێن جیبجیکرن. د ھەمان دەمێ دە، سەرۆکاتیا رووحانی یا دورزیان ژی د داخویانیێن ھەڤدەم دە بەندێن سەرەکی یێن پەیمانێ پشتراست کرن و تەکەزی ل سەر “قەدەغەکرنا کەتنا ھەر ھێزەکێ ژ دەرڤەیی پارێزگەھێ” کرن.

ئاژانسا نووچەیان یا سووریێ (سانا) ژ سەر زارێ پارێزگارێ سوەیدایێ بەشار بەکوور راگھاند: “ل سەر داخوازا ھندەک ئالیان ژ بۆ ھێسانکرن و لەزکرنا پێڤاژۆیا ڤەگەراندنا ئەولەھی و ئارامیێ بۆ پارێزگەھا سوێدایێ، ھندەک گوھەرتنێن بچووک د پەیمانێ دە ھاتن کرن.”

بەکوور ژ بۆ ئاژانسێ تەکەز کر، دەولەت ژ بۆ چارەسەرکرنا پرسگرێکان ل پارێزگەھا سوەیدایێ ھەولێن جدی ددە و گۆت: “ئەم دکارین ببێژین کو ئەم نێزیکی بدەستخستنا ئەنجامێن خەباتا خوە یا بێوەستان یا د ھەیاما بۆری دە نە.”

بەکوور تەکەز کر ژی: “پێکھاتەیا دورزی بەشەک ژ پێکھاتەیا جڤاکی یا رەسەن یا سووریێیە، مە ھەموویان داخویانیا شێخێن دورزیان شۆپاند کو تێ دە دەستێوەردانا دەرڤە رەد دکن و تەکەزی ل سەر چارەسەرکرنا پرسگرێکان د ناڤبەرا گەلێ سووریێ دە دکن.”

بەندێن سەرەکی یێن رێکەفتنێ

سەرۆکاتیا رووحانی یا پێکھاتەیا مسلمانێن مووەحید یێن دورزی د داخویانیەکێ دە راگھاند، ئەو ئەنجامێن جڤینا کو دو رۆژ بەرێ ب بەشداریا شێخ حکمەت ھەجری (سەرۆکێ رووحانی)، ھەر دو شێخان یووسف جەربوو و حەموود ھناوی، میر حەسەن ئەترەش، میر یەحیا عامر، عاتف ھنێدی، وەسیم عزەدین و نوونەرێن کۆمێن لەشکەری ھاتبوو لدارخستن، پشتراست دکە.

د داخویانیێ دە ل سەر 5 بەندێن سەرەکی ھاتە تەکەزکرن:

1. ئاکتیڤکرنا پۆلیسان ژ ئەندامێن بەرێ یێن ھێزێن ئەولەکاریا ناڤخوەیی.

2. راکرنا دۆرپێچێ ل سەر دەڤەرێن سوەیدایێ.

3. مسۆگەرکرنا بەرپرسیاریا ئەولەھیا رێیا شام-سوەیدایێ.

4. راوەستاندنا گولەبارانێ ل ھەموو دەڤەران.

5. ھەر داخویانیەکا کو ڤان بەندان بنپێ بکە، وەکە داخویانیەکا یەکالی تێ دیتن.

توندووتووژیا داوی و پەیمانا جەرەمانایێ

د رۆژێن بۆری دە، ل ھەرێما جەرەمانا یا نێزیکی شامێ کو پرانیا خەلکێ وێ دورزی نە، کریارێن توندووتووژیێ قەومین و ل گۆری مەدیا سووریێ، ھەری کێم 12 کەسان جانێ خوە ژدەست دان.

توندووتووژی ھەروھا گھشت ھەرێما سەحنایا کو ئەو ژی خوەدی پرانیا دورزییە و ھات راگھاندن کو رۆژا چارشەمبێ پشتی ئێریشەکا چەکداری ل سەر ناڤەندەکا ئەولەکاریا گشتی، 16 کەس ھاتن کوشتن.

رۆژا پێنجشەمێ، حکوومەتا سووریێ لگەل رووسپیێن باژارێ جەرەمانایێ ل سەر رادەستکرنا دەملدەست یا چەکێن گران و زێدەکرنا بەلاڤبوونا ھێزێن ئەولەھیێ ل باژێر ل ھەڤ کربوو. پەیمانێ ھەر وھا ل خوە دگرت کو چەک تەنێ د دەستێ سازیێن دەولەتێ دە بن، چەکێن تاکەکەسی یێن بێ مۆلەت بێن رادەستکرن و ھێزێن وەزارەتا پاراستنێ ژ بۆ ئەولەھیێ ل دەردۆرا باژێر بێن بجیکرن.

ئێریشا ئیسرایلێ

چەند دەمژمێران پشتی پەیمانا ل جەرەمانایێ، ئیسرایلێ ب بەهانەیا “رێگرتنا ل ئێریشا ل دژی دورزیان” ئێریشی ھندەک جھێن ل دەردۆرا کۆشکا سەرۆکاتیێ یا ل پایتەخت شامێ کر.