شاندەکە حكوومه‌تا سووریەیێ سەردانا هێزێن سووریەیا دەمۆکراتیک (ههسهدێ) دکە و پێ رە دانووستاندنان ل سەر بجهانینا لهەڤکرنا ناڤبەرا سەرۆکێ سووریەیێ و فەرماندارێ ههسهدێ دکە.
مەدیایێن سووریەیێ دوهـ (سێشەمیێ، 06.05.2025) پارڤە کر، «شاندەکە حكوومه‌تا سووریەیێ سەردانا هێزێن سووریەیا دەمۆکراتیک (ههسهدێ) ل ناڤ زەڤیا کۆنیکۆیێ ل گونده‌وارێ دێرازۆرێ کر، و هەر دو ئالیان دانووستاندن ل سەر لهەڤکرنا ناڤبەرا سەرۆکێ سووریەیێ یێ دەمکی ئه‌حمه‌د شه‌رع و فەرماندارێ گشتییێ هێزێن سووریەیا دەمۆکراتیک (ههسهدێ) مەزلووم عه‌بدی کرن».
چاڤکانیان د ڤی واری دە گۆتیە، «بزاڤەکە زێدە ژ ئالیێ وەلاتێن هەرێمێ و یێن ناڤدەولەتی ڤە ژ بۆ بەردەوامیا دانووستاندنان و تەمامکرنا لهەڤکرنا ناڤبەرا ئه‌حمه‌د شه‌رع و مەزلووم عه‌بدی هەیە، نه‌خاسمه ژی پشتی ئالۆزیێن ڤێ داویێ».
چاڤکانیان ئاماژە ژی دایە، «هەر دو ئالیان د جڤینا ناڤبەرا خوە دە بجهانینا لهەڤکرنا بەنداڤا تشرینێ پێدڤی دیت، هەروەسا تەکەز ل سەر وێ یەکێ ژی کر کو ژ هەمی هەڤرکیێن سەربازی بێ دوورخستن».
وان چاڤکانیان رەد ژی کریە کو، هەر دو بنگەهێن سەربازییێن ئۆمەر و کۆنیکۆیێ رادەستی حكوومه‌تا سووریەیێ هاتبن کرن، بەلکی نها تەکەز ل سەر بجهانینا لهەڤکرنا ناڤبەرا ئه‌حمه‌د شه‌رع و مەزلووم عه‌بدی تێ کرن.
د چارچۆڤەیا بزاڤێن بجهانینا شەرتێن لهەڤکرنا ناڤبەرا هێزێن سووریەیا دەمۆکراتیک (ههسهدێ) و برێڤەبەریا نوو یا سووریەیێ دە، فەرماندارێ گشتییێ هێزێن سووریەیا دەمۆکراتیک (ههسهدێ) مەزلووم عه‌بدی و نوونەرێ حكوومه‌تا سووریەیێ یا نوو هسێن سەلام ژ بۆ جارا دویێ ل حه‌سه‌كه یا رۆژئاڤایێ کوردستانێ جڤیان.
د وێ جڤینێ دە، دانووستاندن ل سەر بجهانینا لهەڤکرنا ناڤبەرا هەر دو ئالیان هاتن کرن، کو ل 10ێ ئادارا ئیسال هاتبوو ئیمزاکرن. هەروەسا تەکەز ل سەر کێمکرنا ئالۆزیان ل دەردۆرا بەنداڤا تشرینێ ژی هات کرن.
