وەزیرێ بەرەڤانیێ یێ ئیسرایلێ یسرایل کاتز، گەفێن توند ل حووسیێن یەمەنێ خوارن و راگھاند، ئەگەر ئەو د ئێریشێن خوەیێن مووشەکی دە ل سەر ئیسرایلێ بەردەوام بن، ئیسرایل دێ بەرسڤەکا توند بدە و دەربێن گران ل وان بخە.
یسرایل کاتز د داخویانیەکێ دە گۆت: “تشتێ کو ئیسرایلێ ل ھەمبەر حووسیان کریە، دێ ل ھەمبەر ئیرانێ ژی بکە” و ئاماژە ب ئێریشێن کو دو رۆژ بەرێ ل دژی چەپەرێن حووسیان ل یەمەنێ ھاتبوون دەستپێکرن، کر.
تەکەز کر ژی، ئیسرایل خوەدی شیانا خوەپاراستنێ یە و دێ بێ دودلی ب ھێزێن خوە ل ھەمبەر ھەر گەف و دژمنەکێ بسەکنە. ھەروھا گۆت: “تشتێ کو مە ل بەیرووتێ ل دژی حزبوللاھێ، ل غەززەیێ ل دژی حەماسێ، ل شامێ ل دژی ئەسەد و ل یەمەنێ ل دژی حووسیان کر – ئەم دێ ل دژی تەھرانێ ژی بکن.”
ژ ئالیێ خوە ڤە، سەرۆکوەزیرێ ئیسرایلێ بەنیامین نەتانیاھو ژی پشتراست کر، “وەلاتێ وی خوەدی شیانا خوەپاراستنێ یە.” نەتانیاھو د ڤێ چارچۆڤەیێ دە ئاماژە ب رێکەفتنا کو تێ گۆتن د ناڤبەرا ئامەریکا و حووسیان دە ب ناڤبەینکاریا سەلتەنەتیا عۆمانێ پێک ھاتیە، کر.
وەزیرێ دەرڤەیێ عۆمانێ بەدر ئەلبووسەیدی رۆژا سێشەما بۆری راگھاندبوو کو د ناڤبەرا حووسیان و ئامەریکایێ دە ئاگربەستەک پێک ھاتیە و گۆتبوو، “چ ئالیەک ئێریشی ئالیێ دن ناکە، د ناڤ دە کەشتیێن ئامەریکی یێن ل دەریایا سۆر و تەنگاڤا باب ئەل-مەندەب.” لێبەلێ، سەرکردەیێن حووسیان ئەڤ رێکەفتن رەد کرن و راگھاندن کو چ لھەڤکرنەک چێنەبوویە و ئەڤ ئیدیعا “ژ راستیێ دوورە.”
