ئەردۆگان نوونەرێ خوەیێ ژ بۆ کارووبارێن ئیراقێ دیار کر

سەرۆککۆمارێ ترکیەیێ رەجەب تەییب ئەردۆگان ژ بۆ جارا یەکەم نوونەرێ خوەیێ تایبەت ژ بۆ کارووبارێن ئیراقێ دەستنیشان کر.

فەیسەل ئەرۆگلو وەک نوونەرێ تایبەت یێ ئەردۆگان ژ بۆ کارووبارێن ئیراقێ ھات دیارکرن و بریارا تێکلدار د رۆژنامەیا فەرمی یا ترکیێ دە ھات وەشاندن کو ئیمزەیا سەرۆککۆمارێ ترکیەیێ ل سەرە.

فەیسەل ئەرۆگلو کو د 18ێ تەباخا 1948 دە ل باژارێ شوھوتێ یێ پارێزگەھا ئافیۆنکاراھسارێ یا ترکیەیێ ژ دایک بوویە، د ناڤبەرا سالێن 2007-2011 دە وەزیرێ دارستان و ژینگەھێ و ژ سالا 2011 ھەتا 2018 ژی وەزیرێ دارستان و کارووبارێن ئاڤێ یێ ترکیەیێ بوو.

ئەڤ پێنگاڤ د دەمەکێ دە دهێت کو سەرۆکوەزیرێ ئیراقێ محەمەد شیاع سوودانی ئیرۆ 8/5/2025، ب سەردانەکا فەرمی گھیشتیە ئەنقەرەیێ و ژ ئالیێ سەرۆککۆمارێ ترکیەیێ رەجەب تەییب ئەردۆگان ڤە ھاتیە پێشوازیکرن.

تێ تەخمینکرن کو د چارچۆڤەیا ڤێ سەردانێ دە، ھەژمارەک رێکەفتن د ناڤبەرا ھەردو وەلاتان دە بێن ئیمزەکرن.