ئەردۆگان تەکەز دکە، “ئیرۆ بە یان سبە، پەکەکە دێ ھەر چەکێن خوە دانە.” ھەروەسا دبێژە، “دبە کو ھندەک کەس ھەبن مفا ژ تێکدانا پێڤاژۆیا ئاشتیێ وەربگرن.”
سەرۆککۆمارێ ترکیەیێ رەجەب تەییب ئەردۆگان ئیرۆ رۆژا پێنجشەمبی 8/5/2025، پێشوازیا ھەژمارەکا پەرلەمانتەرێن ئاک پارتیێ و وەزیرێن کابینەیا خوە کر.
ل گۆر زانیارێن مەدیایێن ترکیەیێ، ئەردۆگان د چارچۆڤەیا وێ ھەڤدیتنێ دە راگەھاندیە کو، ژ ھەمی ئاستەنگان دەرباز بوویە، ئیرۆ بە یان سبە پەکەکە دێ ھەر چەکێن خوە دانە و رێکخستنا خوە ھلدوەشینە.
ئەردۆگان ئاماژە ژی دایە، “پشتی نەمانا پەکەکێ، پێڤاژۆیەکا نوو، سەردەمەک نوو ژ بۆ مە هەموویان دەست پێ دکە و مەیدانا سیاسی ژی دێ رۆلەکی مەزن د پێڤاژۆیێ دە ھەبە.” ھەروەسا ئەردۆگان ھایداری ژی دایە کو، دڤێت ئەو پێڤاژۆ باش بهێت برێڤەبرن.
ناڤبری رۆن ژی کر، “دبە کو ھندەک کەس ھەبن مفا ژ تێکدانا پێڤاژۆیا ئاشتیێ وەربگرن و دڤێت ئەم ژ بۆ وێ یەکێ ئامادە بن.” ھەروەسا راگەھاند، “پێڤاژۆیەکە ھێسان چاڤەرێ ناکە و باوەری ب کارکرنا ئەندامێن خوە ژ بۆ سەرکەفتنا وێ پێڤاژۆیێ ھەیە.”
ھەروەسا وەکی تەکەزکرنەک ژ بۆ گۆتنێن ئەردۆگان، بەردەڤکێ پارتیا داد و پێشخستنێیا ترکیەیێ (ئاک پارتیێ) عۆمەر چەلیک د نووترین داخویانیا خوە دە راگەھاندیە، “ئەردۆگان بانگ ل ئەندامێن ئاکەپێ کر کو ل ھەمبەر پێڤاژۆیا ترکیەیا بێ تەرۆر حەساس بن و ژ نێزیک ڤە بشۆپینن و پشتەڤانیا وێ بکن.”
بەردەڤکێ ئاک پارتیێ ھەروەسا گۆت، “ئەو پێڤاژۆ ژ ھەمی ئالیێن وێ ڤە تێ چاڤدێریکرن. ئەڤ پێڤاژۆ سیاسەتا دەولەتێ یە. دڤێت ب زووترین دەم پەکەکە و تایێن وێ چەکێن خوە دانن و خوە ھلوەشینن.”
عۆمەر چەلیک ئاماژە ژی دا، “ھەر گاڤەکا بەربچاڤا بەر ب بداوی ئانینا تەرۆرێ و ژھۆلێ راکرنا پەکەکێ ڤە دێ گاڤێن ئەرێنی یێن نوو ب خوە رە بینە. د ھەڤدیتنا سەرۆککۆمار و باخچەلی دە، بەحسا پێڤاژۆیا ترکیەیا بێ تەرۆر ھاتیە کرن.”
