بەردەڤکێ وەزارەتا دەرڤە یا ئیرانێ پێشوازیا بریارا پەکەکێ کر و راگەھاند، “ئەڤ ژ بۆ نەھێلانا توندووتیژیێ و سەقامگریا ئەولەھیا دەڤەرێ گاڤەکا گرینگە.”
بەردەڤکێ وەزارەتا دەرڤەیا ئیرانێ ئیسماعیل بەقایی ئیرۆ سێشەمبێ، 13/5/2025 راگەھاند، “ئەم پێشوازیا بریارا پەکەکێ ژ بۆ خوەھلوەشاندن و چەکدانانێ دکن. ئەڤ ژ بۆ نەھێلانا توندوتیژیێ و سەقامگیریا ئەولەھیا دەڤەرێ گاڤەکا گرینگە.”
بەردەڤکێ وەزارەتا دەرڤەیا ئیرانێ ھەر وھا ھێڤی ژی کر کو، ئەنجاما ڤێ پێڤاژۆیێ ببە سەدەما زێدەتر ئارامی و ئاشتیێ ل ترکیەیێ.
پارتیا کارکەرێن کوردستانێ (پەکەکێ) ل رۆژا دوشەمبێ، 12/5/2025، د راگەھاندنەکێ دە ئەنجامێ کۆنگرەیا خوەیا 12 راگەھاند، کو د ناڤبەرا 5 ھەتا 7 ڤێ مەھێ دە ل ژێر رۆناھیا بانگا رێبەرێ پارتیا کارکەرێن کوردستانێ (پەکەکێ) یێ زیندانکری عەبدللا ئۆجالان ھات لدارخستن.
پەکەکێ د راگەھاندنا خوە دە ئاماژە ژی دایە، “خەباتا پەکەکێ سیاسەتا ئینکار و وێرانکرنێ یا ل دژی گەلێ مە نەھێلایە، پرسا کوردان ب رێیا سیاسەتا دەمۆکراسی گەھاندیە خالا چارەکرنێ و ژ ڤی ئالی ڤە پەکەکێ ئەرکێ خوەیێ دیرۆکی تەمام کریە. ل سەر ڤێ بنگەھێ، کۆنگرەیا 12ێ یا پەکەکێ ب مەرەما بجھانین و برێڤەبرنا پرۆسەیا کریارکی ل ژێر سەرکردەتیا رێبەر ئاپۆ (عەبدللا ئۆجالان)، بریارا ھەلوەشاندنا ھەیکەلێ رێکخستنی یێ پەکەکێ و بداویانینا ئاوایێ خەباتا چەکداریێ دا، ھەروەسا ئەو چالاکی ژی بداوی ئانینێن کو ب ناڤێ پەکەکێ تێن کرن.”
