مالپەرا مۆنیتۆرێ یا ئامەریکایی ژ زارێ بەرپرسەکی کۆچکا سپی پارڤە کریە کو، سەرۆکێ ئامەریکایێ دۆنالد ترامپ سبە ل عەرەبستانا سعوودی سەرۆکێ سووریەیێ ئەحمەد شەرع دبینە و سلاڤەکێ ل وی دکە.
مالپەرا مۆنتۆر ئیرۆ سێشەمبێ، 13ێ گولانا 2025ێ پارڤە کریە، “سەرۆکێ ئامەریکایێ دۆنالد ترامپ سبە چارشەمبێ، 14/5/2025ێ ل عەرەبستانا سعوودی سەرۆکێ سووریەیێ ئەحمەد شەرع دبینە.”
رۆژنامەیا تایمس یا بریتانیایی دوھی 12ێ گولانا 2025ێ پارڤە کربوو، “ئەحمەد شەرع ئامادەیە کو ھەرێمەکا بێچەک ئاڤا بکە و ھەروەسا رێیێ بدە ئیسرایلێ کو ل باشوورێ رۆژئاڤایێ سووریەیێ ھەبوونەکا لەشکەری ھەبە.”
رۆژنامەیا تایمس ئەشکەرە ژی کربوو کو، بریارە ئەحمەد شەرع د وێ ھەڤدیتنێ دە ژ سەرۆکێ ئامەریکایێ دۆنالد ترامپ داخوازا راکرنا سزایێن ل سەر سووریەیێ بکە، ل بەرانبەری دەستبەردانا سووریەیێ ژ چەند پرسان.
تەلەڤزیۆنا سووریەیێ ژی پارڤە کریە کو، سەرۆکێ ئامەریکایێ دۆنالد ترامپ د کۆنفەرانسەکە رۆژنامەڤانی دە ل عەرەبستانا سعوودی ژ رۆژنامەڤانان رە گۆت، “بەلێ، ئەز دفکرم کو ئەم دێ لگەل شەرع بجڤن.”
