پەکەکێ کۆنگرەیا خوە یا 12ەمین یا ئاوارتە لدارخست. ل گۆر داخویانیا وان، ئاڤاهیا خوە یا رێخستنی هلوەشاند و داوی ب خەباتا خوە یا چەکداری ئانی. نها هندەک هویرکاتی و دیمەنێن نوو یێن کۆنگرەیێ تێن پارڤەکرن. لێ هوسا دیارە کو ژ بۆی شیرۆڤە ل سەر نەیێ کرن، ئەڤ دیمەن ب دەهان سەفوکان را دەرباس کرنە و پاشێ پارڤە کرنە، لێ دیسا ژی داخویانیێن وان و هۆلا کۆنگرەیێ گەلەک راستییان پێشبەری مە دکە.
د کۆنگرەیا پەکەکێ دە رەنگ و رحا کوردستانی نەبوو
د هۆلا گۆنگرەیێ دە ئالایێ کوردستان و وێنەیێن رێبەرێن کوردان یێن وەکە شێخ سەعید و…هتد نەبوون. و دیسا سلۆگانا کو ل سەر دیواری دانیبوون یەک پەیڤا کوردستانێ دەرباس نەدبوو، تەنێ ل سەر سۆسیالیزمێ سلۆگان دانین. هەمان دەم ئەو سۆندا کو ل داویێ د کۆنگرەیێ دە هات خوەندن ل سەر ئازادیا کورد و کوردستانێ چ پەیڤەک دەرباس نەدبوو. لێ بەلێ د داخویانیا کۆنگرەیێ دە سلۆگانا چەپێن ترکا یا “ترکیەیا د هەر ئالی دە سەربخوە” هات ڤەگۆتن و سۆزا بجی ئانینا وێ سلۆگانێ دان. واتە پەکەکێ سلۆگانا خوە یا “کوردستانا سەربخوە” ل ملەکی هشت و ئەو دێ ئێدی ل سەر سلۆگانا “ترکیەیەک سەربخوە” تەڤ بگەرن.
داخویانیا کۆنگرە گۆت ئارمانجا وان ئەڤەیە کو سۆسیالیزما جڤاکا دەمۆکراتیک ئاڤا بکن. ل دوماهیکا کۆنگرەیێ سلۆگانا “بژی سەرۆک ئاپۆ، بژی پەکەکە، ژن ژیان ئازادی” قیریان، لێ بەلێ، ژ بۆی هەزاران ئینسانێن کو ژ بۆی سەرخوەبوونا کورد و کوردستانێ دەرکەتبوون یەک سلۆگان ژی نەئاڤێتن.
بێ مەعنەویاتبوونا جەمیل بایک و هندەک رێڤەبەرێن پەکەکێ ل بەر چاڤ بوو
د کۆنگرەیێ دە تشتەکی بالکێش ئەڤ بوو کو رێڤەبەرێن پەکەکێ گەلەکی ماندی و بێ مەعنەویات دیار بوون، تایبەت ژی ئەڤ کۆنگرەیا دوران کالکان ب رێڤە دبر، جەمیل بایک، بەسێ هۆزات، سۆزدار ئاڤێستا و هندەک کەسێن دن ب یەکجاری هلوەشیایی دیار بوون، هەر وەکە ئەو ل بەر جەنازەیەکی راوەستیابوون.
جەمیل بایک کو د ڤان سالێن داویێ دە بووبوو ناڤێ یەکەمینێ پەکەکێ ب زۆری خوە ل سەر پیان گرتبوو. جەمیل بایک و کادرۆیێن دن باش دزانن یێ کو گۆتنێن ئۆجالان رەفز بکن و رەخنە بکن مافێ ژیانێ ژ بۆی وان نامینە. ژ بەر وی یەکێ یەک ب یەک دەرکەتن و سۆند خوارن کو ئەو دێ ل پەی ئۆجالان بمەشن.
د دیوانا کۆنگرەیێ دە کی هەبوو
جەمیل بایک وەک ئەندامەکی دامەزرینەر تەڤاهی دیوانا کۆنگرە دە حازر بوو، لێ ڤێ جارێ خوە پاشڤە دابوو، دیسا کەسێن وەکە مستەفا کاراسو و باهۆز ئەردال د کۆنگرەیێ دە حازر نەبوون. کۆنگرەیا کو موراد کارایلان برێڤە دبر و هێزێن عەسکەری تێ دە بوون، ئەڤ کەس تێ دە بوون:
1. جەمال، موراد قارایلان
ژدایکبوون: عورفا، 1954
2. زۆزان چەولیک، ئەمینە سەرینیەر
ژ دایکبوون: بینگۆل، 1979
3. فەریدە ئالکان، تورکان چەتین
ژدایکبوون: هیزان، 1976
4. جومعا بلیکی، ئەعـەد ئولکەر
ژ دایکبوون: شرنەخ، 1989
5. عیرفان ئامەد، مەهمەت تاهیر کلج
ژدایکبوون: ئامەد، 1966
د کۆنگرەیا کو دوران کالکان ب رێڤە دبر دە ئەڤ کەس هەبوون:
1. عەباس، دوران کالکان
ژ دایکبوون: ئادانا، 1954
2. سەبری، سەبری ئۆک
ژدایکبوون، “ئادیامان “سەمسۆر، 1952
3. راپەرین دێرسم، ئوزلەم ئالپاسلان
ژدایکبوون: دێرسم، 1974
4. هێلین ئومید، نیلۆفەر چۆپان
ژدایکبوون: ئیستانبۆل، 1978
5. خالیدە ئەنگیزەک، حەنیفە حوسێن
ژدایکبوون، عەفرین 1975
رێڤەبەرێن پەکەکێ ب تەلەفۆنێ لگەل ئۆجالان ئاخڤینە یان نا؟
ژ دەستپێکا پێڤاژۆیێ هەتا نها عەبدوللا ئۆجالان ب رێیا ڤیدیۆ و نامە ب رێڤەبەرییا قەندیلێ رە د ناڤا پەیوەندیێ دە بوو. لێ بەلێ دو هەفتەیان پێش کۆنگرەیێ لگەل هندەک رێڤەبەرێن پەکەکێ ب تەلەفۆنێ ئاخڤی و ئۆجالان ژ وان رە گۆت، بلا وە چ گومان نەبە، هەموو بەرپرساتی ل سەر منە، و محەمەد ئەمین پێنجوینی کو کەسەکی نێزی پەکەکێ یە ئەشکەرە کر کو ئۆجالان ب تەلەفۆنێ بەشداری کۆنگرەیێ بوویە.
گەلەک دەردۆر ئیدیعا دکن کو ئۆجالان نها نە ل ئیمرالیێ یە و ل ئەنقەرێ ب جی بوویە، داکو بکاربە پێڤاژۆیێ ژ نێزیک ڤە برێڤە ببە، ژ خوە تێ دیتن کو هەر رۆژ نامەیەکا ئۆجالان تێ پارڤەکرن، هەتتا تێ ئیدیعا کرن کو ل نەخۆشخانەیەکە عەسکەری یا ب ناڤێ “گولهانە” عەمەلیاتا چاڤان چێکریە، واتە ئەڤ هەموو ددن دیارکرن کو ئۆجالان رۆژانە ب خوە پەکەکێ برێڤە دبە، واتە ئەڤ گۆتنێن کو دبێژن هەر دو ئالی، ئانکارا و قەندیل یانژی دەولەت و پەکەکە، ئێدی واتەیا وان نەمایە، ئیدی تەنێ ئانکارا هەیە، هەموو بریار ل ئانکارایێ تێن گرتن و تەحویلی پەکەکێ تێن کرن، یێ بریارێ ژی دگرن باخچەلی، ئەردۆگان و ئۆجالانن، ل سەر مێزێ وان ژی پرسا کوردی نا بەلکو پرسا هەستکرنا ترکیەیێ هەیە، هەموو هۆرگلیێن کۆنگرەیێ نیشانی مە ددن پەکەکە دەست ژ هەبوونا خوە یا چەکداری بەرددە، لێ بەلێ دەست ژ خەتا تورکیەبوون و کورد کرنە پەرچەک ژ ترکان بەرنەدایە.
