سەرۆکێ پارتیا گەل یا کۆماری (جەهەپێ) ئۆزگور ئۆزەل، داخوازا سەرۆککۆمارێ ترکیەیێ رەجەب تەییب ئەردۆگان یا ژ بۆ بەشداربوونا د نڤیساندنا دەستوورەکە نوو دە رەد کر. ئۆزەل گۆت: “ئەم نکارن لگەل کەسێن کو باوەریێ ب یاسایێ ناینن گۆتووبێژ و لھەڤکرنێ بکن، دڤێت ئەم ل دژی وان راوەستن.”
سەرۆککۆمارێ ترکیەیێ رەجەب تەییب ئەردۆگان رۆژا 22 گولانێ ئاماژە ب وێ یەکێ کربوو کو پێویستیا ترکیەیێ ب دەستوورەکە نوو یا سڤیل، لیبەرال و دەمۆکراتیک ھەیە و داخواز ژ جەهەپێ کربوو کو بەشداری نڤیساندنا وێ ببە.
ئۆزەل دوھ 23 گولانێ سەردانا سەرۆکێ شارەداریا باژارێ مەزن یا ستەنبۆلێ ئەکرەم ئیمامۆغلو کر، کو ژ 19ێ ئادارا بۆری ڤە ب تۆھمەتا گەندەلیێ گرتییە. پشتی سەردانێ، ئۆزەل راگھاند: “دڤێت د سەری دە ترکیە ڤەگەرە رەوشا خوە یا ئاسایی و زەمین ژ بۆ گۆتووبێژان خوەش ببە. ھەروھا دڤێت ترکیە سەری ل بەر بریارێن دادگەھا دەستووری و دادگەھا مافێن مرۆڤان یا ئەورۆپایێ بتەوینە.”
ئەردۆگان بەرێ راگھاندبوو کو “دەستوورێ ژ بۆ خوە ناخوازە، بەلکی دەستوورێ ژ بۆ ترکیەیێ دخوازە” و ئاماژە ب وێ یەکێ ژی کربوو کو ناخوازە جارەکە دن خوە ژ بۆ پۆستا سەرۆککۆماریێ و برێڤەبرنا وەلات کاندید بکە.
لێ بەلێ، سەرۆکێ پارتیا تەڤگەرا نەتەوەپەرەست (مەھەپێ) دەولەت باخچەلی و ھەڤپەیمانێ ئەردۆگان، د داخویانیەکێ دە دیار کربوو کو پێویستیا کۆمارا ترکیەیێ و گەلێ ترک ب رەجەب تەییب ئەردۆگان ھەیە کو “نەخشەرێیا سەدسالا نوو داتینە” و گۆتبوو: “مافێ سەرۆک نینە کو خوە ڤەکشینە دەما کو گرینگیێ ددە وەلات و گەلێ خوە.”
ئۆپەراسیۆن ل دژی دەردۆرا ئیمامۆغلو
ئەڤ یەک د دەمەکێ دەیە، دوھ د ئۆپەراسیۆنەکا پۆلیسان دە، رێڤەبەرێ تیما ئەولەکاری و پاسەوانێن ئەکرەم ئیمامۆغلو، موستەفا ئاکن سەکرەتەرێ تایبەتێ ئیمامۆغلو، قەدری قەسابۆغلو ھاتبوون دەستەسەرکرن. ھەروھا د ھەمان ئۆپەراسیۆنێ دە، جیگرێ سەکرەتەرێ گشتی یێ ئەنجوومەنا شارەداریێ گورکان ئالپای و سەرۆکێ دەستەیا رێڤەبەرا کیپتاشێ (سازیا ئاڤاھیسازیێ یا شارەداریا ستەنبۆلێ) عەلی کورت ژی ھاتن گرتن.
