سەرۆککۆمارێ ترکیەیێ رەجەب تەییب ئەردۆگان و سەرۆکێ نوویێ سووریەیێ ئەحمەد شەرع، ل ستەنبۆلێ جڤیان. د جڤینێ دە ب تایبەتی تێکلیێن دوئالی و ھەڤکاریا د وارێ رووبرووبوونا تەرۆرێ دە ھاتن گۆتووبێژکرن.
سەرۆکێ نوو یێ سووریەیێ ئەحمەد شەرع ئیرۆ 24 گولانا 2025 ب سەردانەکێ کو بەرێ نەھاتبوو راگھاندن گھشتە ستەنبۆلێ و ل کۆشکا دۆلماباخچەیێ ژ ئالیێ سەرۆککۆمارێ ترکیەیێ رەجەب تەییب ئەردۆگان ڤە ھات پێشوازیکرن.
ل گۆری داخویانیا سەرۆکاتیا کۆمارا سووریەیێ، ھەردو ئالیان تێکلیێن دوئالی یێن د ناڤبەرا ئەنقەرە و شامێ دە د ھەموو واران دە، ب تایبەتی ژی ل سەر مژارا رووبرووبوونا تەرۆرێ، ب ھوورگلی نرخاندن.
ھات راگھاندن کو جڤینا کو دو دەمژمێر و نیڤان دەوام کر، وەزیرێ دەرڤەیێ سووریەیێ ئەسعەد شەیبانی، وەزیرێ بەرەڤانیێ یێ سووریەیێ مورحەف عەبوو قەسرە، وەزیرێ دەرڤەیێ ترکیەیێ ھاکان فیدان، وەزیرێ بەرەڤانیێ یێ ترکیەیێ یاشار گولەر و سەرۆکێ سازیا ئیستخباراتا نەتەوەیی یا ترکیەیێ (میت) ئیبراھیم کالن ژی تێ دە ئامادە بوون.
مژارێن دن یێن گرینگ
بەشەکا دن یا گرینگ یا جڤینێ، گۆتووبێژکرنا ل سەر پێکانینا رێکەفتنا د ناڤبەرا شامێ و ھێزێن سووریەیا دەمۆکراتیک (ھەسەدێ) دە بوو. ھات دەستنیشانکرن کو ترکیە ژ بەر کو ئەڤ رێکەفتن ب ئاوایەکی ئەرێنی برێڤە ناچە، نیگەرانە.
ھەروھا ئێریشێن ئیسرایلێ یێن ل سەر سووریەیێ و مژارا راکرنا سزایێن کو ژ ئالیێ ئامەریکا و ئەورۆپایێ ڤە ل سەر شامێ ھاتنە سەپاندن، دو خالێن دن یێن سەرەکی یێن گوفتوگۆیێن د ناڤبەرا ھەردو سەرۆکان دە بوون.
ھات دیارکرن کو بریارە ھەردو وەزیرێن سووری، ژ بلی جڤینا لگەل ئەردۆگان، لگەل ھەڤتایێن خوە یێن ترک ژی جڤینێن تایبەت پێک بینن.
پێشتر ژی ئەردۆگان داخواز ژ حکوومەتا سووریەیێ کربوو کو گرنگیێ بدە رێکەفتنا لگەل ھێزێن سووریا دەمۆکراتیک (ھەسەدێ)، ب تایبەتی ژ بۆ تەڤلیکرنا وان د ناڤ ئارتێشا فەرمی یا سووریەیێ دە.
