شێورمەندێ ئەولەهیا نشتیمانی یا ئیراقێ قاسم ئه‌عره‌جی و سەکرەتەرێ ئەنجوومەنا ئەولەهیا نەتەوەیی یا ئیرانێ عه‌لی ئەکبەر ئەحمەدیان ل سەر پرسا چەکدانینا په‌كه‌كێ و باندۆرا وێ بریارێ ل سەر ئیراق و ئیرانێ دانووستاندنان دکن.
شێورمەندێ ئەولەهیا نشتیمانی یا ئیراقێ قاسم ئه‌عره‌جی و سەکرەتەرێ ئەنجوومەنا ئەولەهیا نەتەوەیی یا ئیرانێ عه‌لی ئەکبەر ئەحمەدیان دوهـ سێشەمیێ 27ێ گولانا 2025ێ د چارچۆڤەیا گەرا 31ێ یا لووتکەیا ئەولەهیێ یا ناڤنەتەوەیی دە ل مۆسکۆ یا پایتەختا رووسیایێ ل سەر پرسا ئەولەهیێ جڤیان.
قاسم ئه‌عره‌جی و عه‌لی ئەکبەر ئەحمەدیان ل سەر پرس و دۆزێن ستراتەژیک ئاخڤین، کو ژ بۆ ئیراق و ئیرانێ گرینگن، د ناڤ دە ژی پەیمانا ئەولەهیێ یا د ناڤبەرا هەردو وەلاتان دە و قۆناغێن پێکانینا وێ پەیمانێ، تەڤی نرخاندنا رەوشا ئەولەهیا دەڤەرێ و بریارا پارتیا کارکەرێن کوردستانێ (په‌كه‌كێ) ژ بۆ خوەهلوەشاندنێ کو باندۆر ل سەر هەردو وەلاتان هەیە.
پارتیا کارکەرێن کوردستانێ (په‌كه‌كێ) ل 12 گولانا 2025ێ د راگەهاندنەکێ دە ئەنجامێ کۆنگرەیا خوە یا 12ێ پارڤە کر و راگەهاند، «ل بەر رۆناهیا بانگا ئۆجالان، په‌كه‌كێ بریارا هەلوەشاندنا هەیکەلێ خوەیێ رێکخستنی دا، هەروەسا بریار دا کو تێکۆشینا چەکداری و هەمی چالاکیێن کو ل سەر ناڤێ وێ تێن کرن بێن بداویئانین».
په‌كه‌كێ د راگەهاندنا خوە دە ئاماژە ژی دایە، «خەباتا په‌كه‌كێ سیاسەتا ئینکار و وێرانکرنێ یا ل دژی گەلێ مە نەهێلایە، پرسا کوردان ب رێیا سیاسەتا دەمۆکراسی گەهاندیە خالا چارەکرنێ و ژ ڤی ئالی ڤە په‌كه‌كێ ئەرکێ خوەیێ دیرۆکی تەمام کریە. ل سەر ڤێ بنگەهێ، کۆنگرەیا 12ێ یا په‌كه‌كێ ب مەرەما بجهانین و برێڤەبرنا پرۆسەیا کریارکی ل ژێر سەرکردەتیا رێبەر ئاپۆ (ئەبدلا ئۆجالان)، بریارا هەلوەشاندنا هەیکەلێ رێکخستنییێ په‌كه‌كێ و بداویئانینا ئاوایێ خەباتا چەکداریێ دا، هەروەسا ئەو چالاکی ژی بداوی ئانینێن کو ب ناڤێ په‌كه‌كێ تێن کرن».
