دو ئەندامێن کۆنگرێسا ئامەریکایێ، جۆ وێلسۆن و گرێگۆری ستوبی، د نامەیەکێ دە ژ وەزیرێ دەرڤەیێ ئامەریکایێ ماركۆ روبیۆ رە، داخوازا سزاکرنا ئیراقێ کرن، ژ بەر کو ب تەمامی د بن کۆنترۆلا ئیرانێ دە یە.
هەر دو کۆنگرێسمەنان د دو تویتێن جودا دە نامەیەکە سێ رووپەلی ژ وەزیرێ دەرڤەیێ ئامەریکایێ ماركۆ رویبۆ رە شاندنە و تێ دە نیگەرانیا خوە ل هەمبەری رەوشا ئیراقێ ئانینە زمان.
د نامەیێ دە هاتیە گۆتن: “ئەم نیگەرانن کو ئیراق ب تەمامی تەسلیمی ئیرانێ بوویە. تەڤی کو زێدەتری 4،400 سەربازێن ئامەریکی د شەرێ ئیراقێ دە بوونە قوربانی، لێ ژ بلی کو ئیراق بوویە یاریه‌كا دەستێ تەهرانێ، هەتا نها تشتەکی دن نەکریە”.
د نامەیێ دە، هەر دو کۆنگرێسمەنان رێڤەبەریا ئۆباما ژی رەخنە کرنە و گۆتنە: “ئۆباما و برەێت مه‌كگورک، ئالیکاریا سەرۆکوەزیرێ بەرێ یێ ئراقێ نووری مالکی کرنە، کو د ئەنجاما رێڤەبەریا خەلەت و زۆرداریا سیاسی ل ئیراقێ دە، داعش سەری هلدا”.
د نامەیێ دە هەروها هاتیە دەستنیشانکرن، ئیران ژ بلی هێزێن ئەولەهیێ، سیستەما سیاسی و ئابۆری یا ئیراقێ ژی کۆنترۆل کریە و پرۆسەیا سیاسی ژ بۆ بەرژەوەندیێن خوە و مانا دلسۆزێن خوە د دەستهلاتێ دە قۆرخ کریە.
د داویا نامەیێ دە، کۆنگرێسمەنان داخواز ژ وەزیرێ دەرڤە روبیۆ کرنە کو کۆمێن چەکدارێن سەر ب ئیرانێ ڤە ل ئیراقێ، تەڤی حەشدا شەعبی، بێن سزاکرن. هەروها د رەوشا کو ئیراق گازا ئیرانێ هاوردە بکە، بلا بێ سزاکرن و هەموو ئەو سازیێن دارایی یێن ئیراقێ کو ئالیکاریا ئیرانێ دکن، بکەڤن لیستەیا سزایان.
