زێدەتری 200 مالباتێن ئیراقی کامپا ھۆلێ یا ل پارێزگەھا حەسەکێ ب جھ ھشتن و ڤەگەریان ئیراقێ. ئەڤ پێڤاژۆ د بن تەدبیرێن توندێن ئەولەھیێ یێن ھێزێن ھەڤپەیمانیا ناڤدەولەتی دە برێڤە چوو.
بەرپرسێ نڤیسگەھا دەرکەتنێ ل کامپا ھۆلێ شوکری حاجی ژ بۆی مەدیایا خوەجھی یا ئیراقێ راگھاند: “ئەڤە ژ دەستپێکا ئیسال ڤە 26ەمین کاروانێ ڤەگەراندنا ئیراقیانە بۆ وەلاتێ وان.” ھەروھا گۆت ژی: “کاروانێ ڤێ جارێ ژ 223 مالباتان پێک تێ کو ھەژمارا وان دگھیتە 832 کەسان.”
شوکری حاجی دا زانین، “ڤەگەرا وان مالباتێن ئراقی یێن کو دخوازن ڤەگەرن وەلاتێ خوە، ب ھەڤاھەنگیا د ناڤبەرا رێڤەبەریا خوەسەر و حکوومەتا ئیراقێ دە بەردەوامە.” ل گۆری حاجی، ئەو مالباتێن ئیراقی ب زێدەتری 20 پاسێن ئیراقی ژ کامپا ھۆلێ بۆ ئیراقێ ھاتنە ڤەگوھەستن و ھێزێن ئامەریکی ژ بۆ مسۆگەرکرنا ئەولەھیا گھیشتنا وان، ھەڤرێتیا کاروانێ کرنە.
د نیڤێ مەھا نیسانێ دە، 241 مالباتێن کو ژ 865 کەسان پێک دھاتن، کامپا ھۆلێ ب ئارمانجا ڤەگەرێ بۆ ئیراقێ ب جھ ھشتبوون.
وەزارەتا کۆچ و کۆچبەران یا ئیراقێ بەرێ ئەشکەرە کربوو کو ھەژمارا کەسێن کو ژ کامپا ھۆلێ ل سووریێ بۆ ئیراقێ ھاتنە ڤەگوھەستن، زێدەتری 15 ھەزار کەسانە، کو پرانیا وان ژن و زارۆکن. ھەروھا، زێدەتری 12 ھەزار و 600 ئیراقیێن دن ھین ژی ل کامپێ مانە و ل بەندا ڤەگوھەستنێ نە.
کامپا ھۆلێ دکەڤە باشوورێ باژارۆکێ ھۆلێ یێ پارێزگەھا حەسەکێ ل رۆژئاڤایێ کوردستانێ. کامپ د بن کۆنترۆلا رێڤەبەریا خوەسەر دەیە و ھێزێن سووریا دەمۆکراتیک (ھەسەدە) ئەولەکاری و کارووبارێن وێ یێن ئەولەھیێ ب رێ ڤە دبە.
بەری نھا، نەتەوەیێن یەکبوویی و فەرمانداریا ناڤەندییا ھێزێن ئامەریکایێ (سێنتکۆم) گەلەک جاران دەربارێ مەترسیێن کو ژ کامپێ دەردکەڤن ھشیاری دابوون، نەمازە ژ بەر کو زارۆکێن ل کامپێ ژ ئالیێ دایکێن خوە ڤە ھینی توندرەویێ دبن.
