ل ویلایەتا کۆلۆرادۆیێ یا ئامەریکایێ ئێریشی سەر خوەنیشدانەکا پشتەڤانیکرنا ئیسرایلێ ھات کرن. بەرپرسێن ئامەریکایێ ژی دبێژن، “ئەو ئێریش تەرۆرستی بوو.”
دەرەنگێ شەڤا بۆری ل بۆلدەرا ویلایەتا کۆلۆرادۆیێ یا ئامەریکایێ ئێریشی سەر خوەنیشاندانەکێ ھات کرن کو ژ بۆ پشتەڤانیکرنا ئیسرایلێ ھاتبوو کرن، د ئەنجامێ دە ھەشت کەس بریندار بوون و برینا یەک ژ وان گرانە.
ل گۆری پۆلیسێن بۆلدەرێ، ناڤێ ئێریشکەری محەمەد سەبری سلێمانە، ئاموورەکی ئاگرھاڤێژ ژ بۆ ئێریشکرنا ل سەر خوەنیشاندەران ب کار ئانیە و د دەما ئێریشکرنێ دە ژی درووشمێن “ئازادی ژ بۆ فلستینێ” گۆتنە.
برێڤەبەرێ گشتییێ نڤیسینگەھا ھەوالگریێ یا فەدەرال (FBI) کات پاتێل ژی ژ ئالیێ خوە ڤە گۆت، “ئەو ئێریش ئێریشەکا تەرۆریستییە، خوەنیشاندەر کرنە ئارمانج و لێکۆلین ھاتنە دەستپێکرن.”
ھەروەسا مالپەرا ئاخۆسێ یا نووچەیان ژ زارێ بەرپرسەکی پایەبلندێ کۆچکا سپی گۆت، “سەرۆکێ ئامەریکایێ دۆنالد ترامپ ل سەر ھوورگلیێن وێ ئێریشێ ھاتیە ھایدارکرن.”
وەزیرێ دەرڤەیێ ئامەریکایێ مارکۆ روبۆ ل سەر حەسابا خوە یا تۆرا جڤاکی یا Xێ نڤیسیە، “جھێ تەرۆرێ ل وەلاتێ مەیێ مەزن نابە.”
بالیۆزێ ئیسرایلێ ل نەتەوەیێن یەکبوویی دانی دانۆن ژی گۆت، “ئەم ل ئامەریکایێ رووبروویی پێلەکا تەرۆرێ یا دژی جھوویان دبن.”
