سەرۆکێ په‌رله‌مانێ ترکیێ تەکەز دکەت کو ئەو د ب رێیا په‌رله‌مانی ژ بۆ بسەرئێخستنا پێڤاژۆیا نوو یا ئاشتیێ کار كه‌ن.
پشتی دوبارە هه‌لبژارتنا وی وەکی سەرۆکێ په‌رله‌مانێ ترکیێ، نومان کورتولموش دوهی سێشەمی 3 هەزیرانا 2025ێ گۆتارەک پێشکێش کر و بال کشاند سەر پێڤاژۆیا نوو یا ئاشتیێ ل ترکیێ و باکورێ کوردستانێ.
سەرۆکێ په‌رله‌مانێ ترکیێ ئاماژە ژی دا، “تەرۆریزم ئێدی ژ رۆژەڤا وەلاتێ مە تێ دەرێخستن و بەرپرسیاریا هەر کەسی یە کو پیڤەرێن دەمۆکراسیێ و پێڤاژۆیا ترکیه‌یا بێ تەرۆر بلند بکەت”.
وەکی کو کورتولموش گۆت، ئەو دێ پێڤاژۆیێ ب رێیا کۆمیسیۆنەکا په‌رله‌مانی ب سەر ئێخن و بەرپرسیاریا هەڤپارا هەمی پارتیێن سیاسی یە کو ل په‌رله‌مانی ل سەر مژارێن گرێدای پێڤاژۆیێ گەنگەشێ بکه‌ن و چارەسەرییان بۆ ببینن.
ئەڤ د دەمەکی دا یە کو، دوهی پاکێجا 10ێ یا دادوەریێ، کو گرێدایی راستڤه‌كرنا قانوونا جەزاکرنێ و 8 قانوونێن دی یە و ژ هێلا فراکسیۆنا ئاكه‌پێ ڤە پێشکێشی سەرۆکاتیێ هاتیه کرن؛ ژ هێلا په‌رله‌مانی ڤە هات په‌سه‌ند كرن.
ب ڤێ پەیرەوی، دەرگه‌هـ ژ بۆ بەردانا 19 هەزار و 800 زیندانیان هات ڤەکرن، کو د ناڤ وان دا هنده‌ك زیندانیێن نەخوەش و پیر ژی هەنە. د هه‌مان دەمی دا، رەنگێن جەزایێ ژ بۆ هنده‌ك تاوانان هاتنه زێدەکرن. پێشتر دەم پارتیێ پاكێجا دادوەریێ وەکی یەک ژ مه‌رجێن پێڤاژۆیا ئاشتیێ تەکەز دکر، لێ پشتی کو ئەو پێشکێشی په‌رله‌مانی هاتیه کرن، پرانیا ئالیان نەرازیبوون نیشان دان و راگهاند کو، ئەو ل گۆری داخواز و هێڤیێن وان نینە.
