بەردەڤکا وەزارەتا دەرڤە یا ئامەریکایێ راگهاند، ئەو ژ برینا مووچەیێن هەرێما کوردستانێ ئاگاهدارن و دا زانین کو چارەسەرکرنا کێشەیان دێ دەرفەتێن وەبەرهێنانێ ژ بۆ کۆمپانیایێن ئامەریکی زێدە بکە.
بەردەڤکا وەزارەتا دەرڤە یا ئامەریکایێ تامی بروس دوهـ 10ێ هەزیرانێ د کۆنفەرانسەکە رۆژنامەڤانی دە بەرسڤا پرسا نووچەگهانێ کوردستان24 دا و دەربارێ برینا مووچەیێن فەرمانبەرێن هەرێما کوردستانێ ژ ئالیێ به‌غدایێ ڤە، بانگ ل هەر دو ئالیان کر کو کێشەیێن خوە ل گۆری دەستوورێ و ب رێیا دیالۆگێ چارەسەر بکن.
تامی بروس د ئاخافتنا خوە دە گۆت: “ئەم ژ برینا مووچەیێن خەلکێ کوردستانێ ژ ئالیێ به‌غدایێ ڤە ئاگاهدارن. ئەم بانگ ل به‌غدا و هەولێرێ دکن کو کێشەیێن خوە ب رێیا دیالۆگەکە ئاڤاکەر و ل گۆری ئەرکێن دەستووری چارەسەر بکن.”
بەردەڤکا وەزارەتا دەرڤە هەروها ئاماژە ب وێ یەکێ ژی کر کو چارەسەرکرنا پرسگرێکا مووچەیان دێ ببە نیشانەکە کو ئیراق ژینگەهەکە وها ئاڤا دکە کو کۆمپانیایێن ئامەریکی بخوازن تێ دە وەبەرهێنانێ بکن.
ئەڤ بانگا ئامەریکایێ د دەمەکێ دە تێ کو بەریا جەژنا قوربانێ، وەزیرا دارایی یا ئیراقێ تەیف سامی ب نڤیسەکە فەرمی راگهاندبوو کو ئەو ئێدی نکارن شاندنا مووچەیان بەردەوام بکن. سامی هنجەتا ڤێ یەکێ ب وێ ڤە گرێ دابوو کو هەرێما کوردستانێ پارا خوە یا د یاسایا بوودجەیێ دە دەرباس کریە و 19.2 تریلیۆن دینار داهاتا نەفتی و نەنه‌فتی رادەستی به‌غدایێ نەکریە.
ل هەمبەری ڤێ بریارێ، وەزارەتا دارایی و سامانێن سروشتی یا هەرێما کوردستانێ د داخویانیەکێ دە ئەڤ هنجەت رەد کربوون و راگهاندبوو کو وان هەموو پابەندیێن خوە بجهـ ئانینە و بریارا به‌غدایێ ب تەمامی سیاسییە، نە یاسایییە.
