وەزارەتا بەرگریێ یا ئیسرایلێ ئیرۆ رۆژا ئینی، 13ێ خزیرانا 2025ێ راگھاند کو، ئیسرایلێ د ئێریشێن خوەیێن ئاسمانی دە ل سەرانسەرێ ئیرانێ پرانیا سەرکردەتیا پایەبلند یا ھێزا ئاسمانی یا پاسدارێن ئیرانێ کوشتنە.
وەزارەتا ناڤبری د بەیاننامەیەکێ دە راگھاند، “وەزیرێ بەرگریێ ھاتیە ھایدارکرن کو، پرانیا سەرکرداتیا ھێزا ئاسمانی یا پاسداران د جڤینەکێ دە ل بنگەھا خوە ھاتنە کوشتن.”
ئارتێشا ئیسرایلێ سەرێ سبەھا ئیرۆ رۆژا ئینی، 13ێ خزیرانا 2025ێ ب رێیا بکارئانینا 200 بالافرێن شەری، ب سەدان ئێریش کرن سەر 300 جھان ل ئیرانێ و د ئەنجامێ دە ھەژمارەکا فەرماندارێن پاسداران و زانایێن ئەتۆمی ھاتن کوشتن.
ئاژانسا تەسنیمێ ئاماژە ژی دا کو، فەرماندارێ ئارتێشا پاسداران حسێن سەلامی، سەردارێ ئارتێشا ئیرانێ محەمەد باقری، سەرۆکێ زانینگەھا ئازادی یا ئیسلامی محەمەد تەھرانچی و زانایێ وارێ ئەتۆمێ فەرەیدوون عەباسی د ئێریشێن ئیسرایلێ دە ھاتنە کوشتن.
رێبەرێ بلندێ کۆمارا ئیسلامی یا ئیرانێ عەلی خامنەیی ژی ژ ئالیێ خوە ڤە راگھاند، “دڤێت ئیسرایل ل بەندا سزایەکێ گران بە و چارەنڤیسەکا تال و بازار ل پێشیا وێیە.”
خامنەیی ئاماژە ژی دا، “ئیسرایلێ ب ئارمانجکرنا جھێن ئاکنجیبوونێ یێن وەلاتیان خسلەتا خوەیا خەراب زێدەتر نیشان دا.” ھەروەسا گۆت، “مخابن، د ئەنجاما ئێریشان دە چەند فەرماندارێن لەشکەری و زانا شەھید بوون.”
