پشتی ئێریشێن لەشکەری یێن ئیسرایلێ، دەزگەھێن ئەولەھیێ یێن ئیرانێ ل سەرانسەرێ وەلات دەست ب ئۆپەراسیۆنێن گرتنێ کرن. مەدیایا فەرمی یا ئیرانێ راگھاند کو ب گشتی 19 کەس ل پارێزگەھێن ھورمزگان و یەزدێ ب تۆھمەتا ھەڤکاریا لگەل ئیسرایلێ ھاتنە گرتن.
ل گۆری نووچەیێن مەدیایا ئیرانێ، ل پارێزگەھا ھورمزگانێ 14 کەس ب تۆھمەتا کو “پێوەندیا وان لگەل ئێریشێن ئیسرایلێ ھەیە” ھاتنە گرتن.
ھەروھا، نڤیسگەھا جیگرێ پارێزگارێ یەزدێ ژی ئەشکەرە کر، ل وێ پارێزگەھێ 5 کەسێن دن ھاتنە دەستەسەرکرن. ل گۆری داخویانیێ، ئەڤ کەس ب وێ یەکێ تێن تۆھمەتبارکرن کو بەریا ئێریشان “وێنەیێن جھ و ناڤەندێن ھەستیار کشاندنە” و ب بەلاڤکرنا ڤان دیمەنان ل سەر تۆرێن جڤاکی، “د ناڤا وەلاتیان دە ترس و خۆف چێکرنە”.
ئەڤ ئۆپەراسیۆنێن گرتنێ، پشتی ئێریشێن بەرفرەھ یێن ئیسرایلێ یێن رۆژا ئینێ، 13ێ خزیرانا 2025ێ تێن. د چارچۆڤەیا ئۆپەراسیۆنا ب ناڤێ “شێرێ راپەری” دە، ئیسرایلێ ب زێدەتری 200 بالەفرێن شەری ئێریشی سەر 200 ئارمانجێن ستراتەژیک ل ئیرانێ کربوو.
د ئێریشان دە ناڤەندێن ئەتۆمی یێن وەکی نەتەنز، فۆردۆ و ئیسفەھان بووبوون ئارمانج و ل گۆری مەدیایا ئیرانێ، شەش زانایێن ئەتۆمی و ھەژمارەکا فەرماندارێن پایەبلندێن ئارتێشا پاسداران، د ناڤ دە سەرئەرکان محەمەد باقری و فەرماندارێ گشتی حوسێن سەلامی، ھاتبوون کوشتن.
ل گۆری دانەیێن کو بالیۆزێ ئیرانێ یێ ل نەتەوەیێن یەکبوویی بەلاڤ کربوون، د ئەنجاما گشتی یا ئێریشان دە 78 کەس ھاتبوون کوشتن و 320 کەس ژی بریندار بووبوون.
