سەرۆکێ ئامەریکایێ دۆنالد ترامپ راگھاند، وەلاتێ وی چ پێوەندی ب ئێریشا ئیسرایلێ یا داوی یا ل سەر ئیرانێ ڤە نینە، لێ د ھەمان دەمێ دە ھشیاریەکا توند دا تەھرانێ کو ئەگەر ئێریشی بەرژەوەندیێن ئامەریکایێ بێ کرن، دێ بەرسڤەکا وان یا “دیرۆکی” ھەبە.
دۆنالد ترامپ ئیرۆ ل سەر پلاتفۆرما خوە یا جڤاکی “تروتز سۆسیال” نڤیسی: “ئامەریکا بەشداری ئێریشا شەڤا بۆری یا ئیسرایلێ یا ل سەر ئیرانێ نەبوویە. لێ ئەگەر ئێریش ل سەر مە بێ کرن، وێ دەمێ بەرسڤا ھێزێن مەیێن چەکدار دێ د ئاستەکێ دە بە کو وە ت جاری نەدیتیە.”
ترامپ د ھەمان پەیامێ دە گۆت کو ئەو دکارە “ب ھێسانی” د ناڤبەرا ئیران و ئیسرایلێ دە پەیمانەکێ چێبکە و ڤی “شەرێ خوینرێژ” بداوی بینە.
بەریا ڤێ داخویانیێ، ترامپ رۆژا ئینێ د پۆستەکێ دن دە وھا گۆتبوو: “دو مەھ بەرێ، من 60 رۆژ مۆھلەت دابوونە ئیرانێ کو ‘لھەڤکرنەکێ بکن’. دڤیابوو وان ئەڤ یەک ئەنجامدابا! ئیرۆ رۆژا 61ێ یە. من ژ وان رە گۆتبوو دڤێت چ بکن، لێ وان نەکر. نھا، دبە کو دەرفەتەکا وان یا دویەم ھەبە!”
تەڤی کو ترامپ بەشداربوونا راستەراست رەد کر، لێ رۆژا ئینێ د داخویانیێن خوە یێن ژ بۆ تەلەڤیزیۆنا سی ئێن ئێن پشتگریا ئامەریکایێ ژ بۆ ئیسرایلێ تەکەز کربوو و ئێریشێن ل سەر ئیرانێ وەک “ئێریشەکا پر سەرکەفتی” ب ناڤ کربوو.
ل گۆری ئاگاھیێن کو دو چاڤکانیێن ئیسرایلی دانە CNNێ، ئامەریکایێ شەڤا ئینێ ئالیکاریا ئیسرایلێ کریە ژ بۆ تێکبرنا مووشەکێن ئیرانێ. یەک ژ چاڤکانیان ھەروھا دەستنیشان کر کو وەلاتێن دن یێن ھەرێمێ ژی ب ھەمان ئاوایی پشتگری دانە سیستەمێن بەرەڤانیا ئاسمانییا ئیسرایلێ.
