وەزیرێ دەرڤەیێ ئیرانێ عەباس ئیراقچی راگھاند، دەلیل د دەستێ وان دە ھەنە کو ئامەریکا پشتگریێ ددە ئێریشێن ئیسرایلێ یێن ل سەر ئیرانێ و دڤێت واشنگتۆن بەرپرسیاریا ڤێ یەکێ ھلگرە. ئیراقچی ھەروھا تەکەز کر، ئیران ناخوازە شەر بەرفرەھ ببە، لێ دێ مافێ خوەیێ ئەنەرژیا ئەتۆمی بپارێزە.
وەزیرێ دەرڤەیێ ئیرانێ، عەباس ئیراقچی ئیرۆ 15ێ خزیرانێ د داخویانیەکێ دە گۆت: “ئامەریکا ھەڤپارێ ئیسرایلێ یە د ئێریشێن ل سەر ئیرانێ دە و دڤێت بەرپرسیاریێ ھلگرە. ئیسرایل نکارە بێیی پشتگریا ئامەریکایێ د ئێریشێن خوە دە بەردەوام بە. دەلیلێن مە ھەنە کو ئامەریکا د ڤان ئێریشان دە پشتگریا ئیسرایلێ دکە.”
ئیراقچی ھشیاری دا و گۆت کو “ھەر پێشکەتنەکا لەشکەری ل ھەرێما کەنداڤێ، دبە کو باندۆرێ ل تەڤاھیا ھەرێم و جیھانێ بکە” و وھا پێ دە چوو: “ئەم ناخوازن شەر بەرفرەھ بکن، ھەیا کو ب سەر مە دە نەیێ سەپاندن.”
دەربارێ ھەلوەستا ناڤدەولەتی دە، ئیراقچی گۆت: “ئەم باوەر دکن کو جڤاکا ناڤدەولەتی دێ ب توندی ئێریشێن ئیسرایلێ یێن ل سەر بنگەهێن مە یێن ئەتۆمی شەرمەزار بکە.”
“ئەم ژ مافێ خوەیێ ئەتۆمی نایێن خوارێ”
ل سەر مژارا پەیمانا ئەتۆمی، وەزیرێ دەرڤەیێ ئیرانێ ھەلوەستا وەلاتێ خوە ب زەلالی ئانی زمان و گۆت: “ئەم ئامادەیی چ پەیمانەکا وسا نینن کو مە ژ مافێ بدەستخستنا ئەنەرژیا ئەتۆمی بێپار بھێلە. ئیسرایل نە پەیمانەکا ئەتۆمی و نە ژی چارەسەریەکا دیپلۆماتیک دخوازە.”
ئیراقچی دیار کر کو ئارمانجا ئێریشێن ئیسرایلێ تێکدانا دانووستاندنانە و گۆت: “ژ سالا 2021 ڤە مە دانوستاندن دکر ژ بۆ ژ نوو ڤە دەستپێکرنا پەیمانا ئەتۆمی، لێ ئیسرایلێ ئێریشی ناڤەندا ئەتۆمی یا نەتەنزێ کر. تشتا کو ئیسرایل نھا ل نەتەنزێ دکە، ب ھەڤکاریا ئامەریکایێ، ئارمانجا وێ تێکدانا دانووستاندنانە.”
د داویێ دە، ئیراقچی بانگ ل ئامەریکایێ کر و گۆت: “ئەم ل بەندێ نە کو واشنگتۆن نیەتا خوەیا پاک نیشان بدە و ئێریشێن ئیسرایلێ یێن ل سەر ناڤەندێن مەیێن ئەتۆمی شەرمەزار بکە.”
