ئیسرایلێ بنگەھا ئارتێشا پاسداران ل تەھرانێ بۆمبەباران کر

ئارتێشا ئیسرایلێ ئیرۆ راگھاند کو، ئێریش کریە سەر بنگەھا ئارتێشا پاسداران ل تەھرانێ.

ئارتێشا ئیسرایلێ سەرێ سبەھا ئیرۆ دوشەمبێ، 16ێ خزیرانا 2025ێ، ب ئێریشێن ئاسمانی بنگەھێن ھێزا قودسێ، ئارتێشا پاسداران و ئارتێشا ئیرانێ ل تەھرانێ و ھەروەسا جھێن لەشکەری ل ناڤەراستا ئیرانێ وێران کرن.

ئارتێشا پاسداران د بەیاننامەیەکێ دە راگھاندیە، “بالافرێن شەری یێن ئیسرایلێ ئێریش کر سەر ناڤەندێن فەرمانداریێ یێن ھێزا قودسێ و ئارتێشا ئیرانێ ل تەھرانێ.” ئاماژە ژی دا، “ئەو بنگەھ ژ بۆ پلانکرنا ئێریشێن تەرۆریستی ل دژی دەولەتا ئیسرایلێ ب رێیا وەکیلێن ئیرانێ ل رۆژھلاتا ناڤین ھاتنە بکار ئانین.”

ئەڤ جھێن کو ھاتنە ئارمانجکرن جھەک بوو ژ بۆ بەرھەمانینا سیستەما بەرگری و مووشەکان، جھەک بوو ژ بۆ بەرھەمانینا سۆتەمەنیێ ژ بۆ جوورێن جودایێن مووشەکان و مۆتۆرێن مووشەکێن.

ناکۆکیێن ئیران و ئیسرایلێ کەتنە رۆژا پێنجێ یا شەر و پەڤچوونێ و ھەر رۆژ ئێریش دکن سەر ھەڤ.

ئەڤ شەر ل سەرێ سبەھا رۆژا ئینێ 13ێ خزیرانا 2025ێ، هاتیە دەستپێکرن، کو ئیسرایلێ ب زێدەتری 200 بالافرێن شەری ب دەھان جھێن لەشکەری و بنگەھێن ئەتۆمی ل تەھرانێ و چەند دەڤەرێن دن یێن ئیرانێ بۆمبەباران کرن. ھەروەسا ھەژمارەکە بەرپرسێن لەشکەری یێن پایەبلند و زانایێن ئەتۆمی کوشتن.