ئارتێشا پاسدارێن ئیرانێ رادگەھینە کو، دو فەرماندارێن وان د ئێریشا ئیرۆ یا ئیسرایلێ دە ھاتنە کوشتن.
ئارتێشا پاسدارێن ئیرانێ ئیرۆ راگھاند، “دو فەرماندارێن مە د ئێریشەکا ئیسرایلێ دە ل دەڤەرا ئیجروودێ یا پارێزگەھا زەنجانێ ل باکورێ رۆژئاڤایێ ئیرانێ ھاتنە کوشتن.”
ئارتێشا پاسداران ئەشکەرە ژی کر، “فەرماندار سەردار رەزا نەجەفی و پاسدار حەسەن رەسوولی ل سەرێ سبەھا ئیرۆ د ئێریشا ئیسرایلێ دە ھاتنە کوشتن.”
ئارتێشا ئیسرایلێ ل سەرێ سبەھا ئیرۆ دوشەمبێ، 16ێ خزیرانا 2025ێ ب ئێریشەکا ئاسمانی بنگەھێن ھێزا قودسێ، ئارتێشا پاسداران و ئارتێشا ئیرانێ ل تەھرانێ و ھەروەسا ناڤەندێن لەشکەری یێن ناڤەراستا ئیرانێ وێران کرن.
ئارتێشا پاسداران د بەیاننامەیەکێ دە راگھاندیە، “بالافرێن شەری یێن ئیسرایلێ ئێریش کر سەر ناڤەندێن فەرمانداریێ یێن ھێزا قودسێ و ئارتێشا ئیرانێ ل تەھرانێ.” ئاماژە ژی دا، “ئەو بنگەھ ژ بۆ پلانکرنا ئێریشێن تەرۆریستی ل دژی دەولەتا ئیسرایلێ ب رێیا وەکیلێن ئیرانێ ل رۆژھلاتا ناڤین ھاتنە بکار ئانین.”
ناکۆکیێن ئیران و ئیسرایلێ کەتنە رۆژا پێنجێ یا شەر و پەڤچوونێ و ھەر رۆژ ئێریش دکن سەر ھەڤ.
ل گۆری ئامارێن وەزارەتا تەندروستیێ یا ئیرانێ، ژ دەستپێکا ئێریشێن ئیسرایلێ یێن ل سەر وی وەلاتی ھەتا ئێڤارا دوھی یەکشەمبێ، 15ێ خزیرانا 2025ێ، 244 کەس ھاتنە کوشتن و زێدەتری ھەزار و 480 کەسان ژی بریندار بوونە.
