ئارتێشا ئیسرائیلێ راگهاند، وان شەڤا بۆری ئێریشەکە بەرفرەهـ بریە سەر بارەگەهێن لەشکەری یێن ل رۆژئاڤایێ ئیرانێ و جهێن دەپۆکرن و ئاڤێتنا مووشەکان هاتنە ئارمانجکرن.
ئارتێشا ئیسرائیلێ ئیرۆ 17ێ هەزیرانێ د داخویانیەکێ دە دیار کر: “شەڤا بۆری مە ئێریشەکە بەرفرەهـ بر سەر بارەگەهێن لەشکەری یێن ل رۆژئاڤایێ ئیرانێ. مە جهێن دەپۆکرن و ئاڤێتنا مووشەکێن ئیرانێ بۆمبەباران کرن و ئەو ژ ناڤ برن.”
ئارتێشا ئیسرائیلێ هەروها ئەشکەرە کر، “ئیرۆ سبەها سێشەمێ، درۆنەک کو ل سەر بلنداهیێن باشوورێ گۆلانێ هاتبوو دیتن، ژ ئالیێ هێزێن مە ڤە هات ئاستەنگکرن و خستن خوارێ.”
د هەمان داخویانیێ دە هات گۆتن کو شەڤا بۆری ئیرانێ شەش مووشەک ئاڤێتنە ئاخا ئیسرائیلێ، کو پێنج ژ وان هاتنە بێباندۆرکرن و یا شەشەمین ل هەرێمەکە ڤەکری یا نەقەبێ کەتیە خوارێ.
ژ ئالیێ خوە ڤە، کانالا 12 یا ئیسرائیلێ ژ زارێ چاڤکانیەکە لەشکەری راگهاند، ئیرانێ هەتا نها د 15 ئێریشان دە 380 مووشەکێن بالیستیک ئاڤێتنە سەر ئیسرائیلێ.
پەڤچوونێن د ناڤبەرا هەر دو ئالیان دە، بەربانگێ رۆژا ئینێ، 13ێ هەزیرانا 2025ان، دەست پێ کرن، دەما کو ئارتێشا ئیسرائیلێ ب ئاوایەکی ژ نشکا ڤە ئێریشی دەزگەهێن مۆشەکی و ئاتۆمی یێن ئیرانێ کر و ئۆپەراسیۆنا ب ناڤێ “رابوونا شێر” راگهاند. د بەرسڤا ڤان ئێریشان دە، ئیرانێ ژی ئۆپەراسیۆنا “سۆزا راست 3” دا دەستپێکرن.
