ئیسرایلێ ئێریشەکا دن یا ئاسمانی ل سەر ئیرانێ ئەنجامدا

ئارتێشا ئیسرایلێ ئیرۆ یەکشەمبێ، 22ێ خزیرانا 2025ێ، راگھاند، “مە دەست ب پێلەکا نوو یا ئێریشێن ئاسمانی ل سەر جھێن لەشکەری ل رۆژئاڤایێ ئیرانێ کریە.”

بەردەڤکێ ئارتێشا ئیسرایلێ راگھاند، “ھێزا ئاسمانی یا ئیسرایلێ دەست ب پێلەکا نوو یا ئێریشێن ئاسمانی ل سەر جھێن لەشکەری یێن رۆژئاڤایێ ئیرانێ کریە.”

بەردەڤکێ ئارتێشا ئیسرایلێ ھەروەسا گۆت، “ھێزا ئاسمانی ئێریش کر سەر وان مووشەکھەلگرێن ئیرانێ یێن کو ئامادە بوون بەر ب ئاخا ئیسرایلێ ڤە بێن ئاڤێتن، کو پێشتر ژی ژ ھێلا پاسدارێن ئیرانێ ڤە ژ بۆ ئێریشکرنا ل سەر ئیسرایلێ دھاتن بکارئانین.”

ئارتێشا پاسداران ژی ژ ئالیێ خوە ڤە راگھاند، “د ئێریشەکا ئیسرایلێ دە، کو ل سەر بنگەھا لەشکەری یا شەھید مەدانی ل تەڤرێزێ ھات کرن، دو کەس بریندار بوون.”

ئیسرایلێ ل سەرێ سبەھا رۆژا ئینێ 13ێ خزیرانا 2025ێ، ب زێدەتری 200 بالافرێن شەری ب دەھان جھێن لەشکەری و بنگەھێن ئەتۆمی ل تەھرانێ و چەند دەڤەرێن دن یێن ئیرانێ بۆمبەباران کرن. ھەروەسا ھەژمارەکا بەرپرسێن لەشکەری یێن پایەبلند و زانایێن ئاتۆمی کوشتن.

ئیرانێ ژی دەرەنگێ شەڤا ئینێ ژ ئالیێ خوە ڤە وەکی بەرسڤەک ژ بۆ ئێریشێن ئیسرایلێ ئۆپەراسیۆنا “سۆزا راستگۆیا 3″ێ راگھاند و ب سەدان مووشەکێن بالیستیک ئاڤێتن تەل ئەڤیڤێ. سیستەما بەرگریا ئاسمانی یا ئیسرایلێ رێ ل پرانیا وان گرت. لێ ھەژمارەکا وان کەت و چەند ئاڤاھی و خانی وێران بوون.