ئارتێشا ئیسرایلێ راگھاند کو، وان ھەژمارەکا نوو یا ئێریشان کریە سەر بنگەھێن مووشەکان و ژێرخانەیا لەشکەری ل رۆژئاڤایێ ئیرانێ.
ئارتێشا ئیسرایلێ ئیرۆ دوشەمبێ، راگھاند کو، وان ھەژمارەکا نوو یا ئێریشان کریە سەر باشوورێ رۆژئاڤایێ باژارێ تەبریزێ، کرمناشان، کەرەج و تەھرانێ، تەڤی بنگەھا گشتی یا ئارتێشا پاسداران ل تەھرانێ.
مەدیایا ئیرانێ ژی راگھاند کو، دەنگێ تەقینان ل کەرەج و تەھرانێ ھاتیە بھیستن، ھەروەسا یەکینەیا زێرەڤانیێ، رێڤەبەری، دادگەھ و دەریێ چوونە ناڤا گرتیگەھا ئەڤینێ ژی ھاتنە بۆمبەبارانکرن.
ئاژانسا رویتەرسێ یا نووچەیان ژی ژ ئالیێ خوە ڤە راگھاند، “ژ بەر ئێریشێن ئیسرایلێ، ئەلەکتریک ل باکورێ تەھرانێ قوت بوویە.”
ئیسرایلێ ل سەرێ سبەھا رۆژا ئینێ 13ی خزیرانا 2025ێ، ب زێدەتری 200 بالافرێن شەری ب دەھان جھێن لەشکەری و بنگەھێن ئەتۆمی ل تەھرانێ و چەند دەڤەرێن دنێن ئیرانێ بۆمبەباران کرن. ھەروەسا ھەژمارەکا بەرپرسێن لەشکەری یێن پایەبلند و زانایێن ئەتۆمی کوشتن.
ئیرانێ ژی دەرەنگێ شەڤا ئینێ ژ ئالیێ خوە ڤە وەکی بەرسڤەک ژ بۆ ئێریشێن ئیسرایلێ ئۆپەراسیۆنا “سۆزا راستگۆ یا 3″ێ راگھاند و ب سەدان مووشەکێن بالیستیک ئاڤێتن تەل ئەڤیڤێ. سیستەما بەرگریا ئاسمانی یا ئیسرایلێ رێ ل پرانیا وان گرت. لێ ھەژمارەکە وان کەت و چەند ئاڤاھی و خانی وێران بوون.
