سمکۆ عه‌بدولعه‌زیز
د کۆنگرەیا 12ەمین یا پەکەکێ دە نامەیا عەڤدللا ئۆجالان هات خوەندن، د نامەیێ دە ئۆجالان ب ئاشکەرایی راگهاند کو پێویستە پەکەکە ژ قۆناغا دەولەتبوونا کوردان دەرباسی قۆناغا دەمۆکراسییا گەلان ببە، ژ بەر کو ئەو وسا دفکرە کو قۆناغا دەمۆکراسییا گەلان بنرختر و بلندترە و گاڤەکە پڕ پێشکەتی یە.
د ڤڕ دە هن پرس سەرهلددن کو ئەو ژی ئەڤن:
گەلۆ گەر نەتەوەیەک دەڤ ژ خوە بەردە وێ ئازاد ببە؟
گەلۆ دەمۆکراسی د نەبوونا سەروەریێ دە تێ جیبجیکرن؟
ئەرێ هزرا نەتەوی بوویە بارەکی گران هەیا کو دەڤ ژێ بەردین؟ یان هێژان ناڤەندەکە خەباتێ یە ژ بۆی خوە ناسکرن و ئازادییێ؟
ل گۆر من، دەمۆکراسییا گەلان یا کو عەڤدللا ئۆجالان پێ داخبار ب تەنێ جوانکاریەکە فەلسەفی یە کو ئۆجالان دخوازە ب ڤێ یەکێ ژ دەست دایینا سەروەرییا نەتەوەیەکە بن دەست پێ بنوخمینە.
دڤێ بێ زانین کو دەمۆکراسییا گەلان یا کو ئۆجالان خوە وەکە خوەدیێ وێ ددە ناسکرن، و رژدە ل سەر جیبجیکرنا وێ، ژ بۆی فیلسۆفێ بەرنیاس بۆکچین و هن دبستانێن رۆژئاڤایی ڤەدگەرە کو بانگا نەدەستهلاتداریێ دکن.
ئەڤ دبستان دبێژن، دڤێ دەولەت وەرە هلوەشاندن هەیا کو جڤاک ب ئاوایەکی گشتی بەشداریێ د برێڤەبرنا وەلات دە بکن.
لێ دڤێ وەرە گۆتن، وێ دەمێ کار ب ڤێ نەرینێ تێ کرن کو هەر نەتەوەیەک مافێن خوە یێن خوەسەریێ ب دەست دخە و پشترە د ناڤا خوە دە بەر ب جیجبجیکرنا وێ فکرێ دچن، ئانکو هەیا کو هەر نەتەوەیەک ب تەمامی سەربخوە و ئازاد نەبە ئەڤ فکر نەما بکاربە وەرە جیبجیکرن. یانی، یا کو ئۆجالان بانگەشەیێ ژێ رە دکە بەرەڤاژی ڤێ فەلسەفەیێ یە، ل سەر ڤێ مژارێ فیلسۆفێ فرەنسی (ئالان بادیوو) دبێژە، “کەسێ کو ل سەر دادوەریێ باخڤە و بێی کو دانپیدانێ ب سەتەمکاریێ بکە، وێ دەمێ خوەدیێ وێ فکرێ د بن ناڤێ بێ ئالیبوونێ دە پەرگالەکێ دروست دکە کو رەواتیێ ددە ستەمکاریێ.
د ڤر دە ئاخافتنا ئالان بادیوو ل سەر ئۆجالان جیبجی دبە، ژ بەر کو ئۆجالان دخوازە ب تێزێن خوە کوردان ژ رزگارکرنا وەلاتێ وان دوور بخە و زلم و زۆرا دەولەتا ترک ب سەر گەلێ کورد دڤەشێرە.
ئۆجالان ب ڤان کارێن خوە پێوەندییا د نێڤبەرا کۆلۆنیالیزمێ و شووناسا نەتەوی ژناڤ دبە، پرۆژەیەکە ئاشۆپی بەرچاڤ دکە و د ڤی پرۆژەیی دە ئیتیراف ب وێ یەکێ نایێ کرن کو ئازادیا بێی خاک و سینۆر و سەروەری ت واتەیەکە خوە تونەیە.
شووناسا نەتەوی ل دژی دەمۆکراسیێ نینە، بەلکو کەڤرێ بنگەهین یێ دەمۆکراسیەتێ یە.
فەرەنسا ب دایکا دەمۆکراسیێ تێ ناسکرن، لێ دەمۆکراسییا وان پشتی سەرکەتنا ل سەر شۆرەشەکە نەتەوی هات جیبجیکرن.
هندستان کو وەکە میناکا وەلاتەکە فرە نەتەوە و ئۆل تێ ناسکرن، قەت دەڤ ژ هەبوونا نەتەوا خوە بەر نەدا و ل دژی ئینگلەندێ کو وەلاتێ وان داگیرکربوو ل بەر خوە دا، ئینگلەند وەکە وەلاتەکە داگرکەر دەست گرت و ئەو ژ وەلاتێ خوە دەرخستن و شووناسا خوە یا نەتەوی پاراست.
فیلسۆفێ ئەلمانی (یوهان فیختە) دەما هەولا داگیرکرنا ئەلمانیا دهات دایین، گۆتارەکی پێشکێشی گەلێ خوە دکە و تێ دە دبێژە، “یەکەم گاڤا دەمۆکراسیێ ئازادی ورزگاربوونا نەتەوی یە.” ئەڤجا باسکرن ل دەمۆکراسییا گەلان د ناڤا دەولەتەکێ دە کو وەلاتێ تە داگیر کربە و هەبوونا تە وەکە نەتەوەیەک جودا ئینکار دکە، خەیال و ئیخانەتەک پڕ مەزنە.
تشتا کو ئۆجالان داخواز دکە ب تەنێ، کۆلەکرن و ئاسمیلەکرنا کوردانە د ناڤا ترکیەیێ دە، ئەو دخوازە کورد بێی شووناس، بێی سینۆر و بێ کەرامەت بن، نە زێدەتر، گەر نا ت جاری داخوازەکە ب ڤی ئاوا ناکە، بەلکو وێ بانگا سەرخوەبوون و دامزراندنا کوردستانەکە سەربخوە و ئازاد بکە.
