شاندا ئیمرالیێ دێ ل گه‌ل ئۆجالان، ئاردۆگان و باخچه‌لی كۆمبیت
ئەندامەکا شاندا ئیمرالیێ رادگهینە کو جڤینا وان یا ب سەرۆکێ پارلەمەنتۆیا ترکیەیێ رە ئەرێنی بوو و ئەوێ د دەمەکە نێزیک دە ب ئۆجالان، ئەردۆگان و چەند بەرپرسێن پایەبلند رە ژی بجڤن.
شاندا پارتیا وەکهەڤی و دەمۆکراسیا گەلان (دەم پارتی) ژ بۆ ئیمرالیێ بەری نیڤرۆیا ئیرۆ (پێنجشەم، 26.06.2025) ب سەرۆکێ پارلەمەنتۆیا ترکیەیێ نومان کورتولموش رە جڤیا. ئەو شاند ژ جیگرا سەرۆکێ پارلامەنتۆیا ترکیەیێ په‌روین بولدان و پارلامەنتەرێ دەم پارتیێ متحه‌ت سەنجار پێک هاتبوو.
په‌روینێ پشتی وێ جڤینێ د کۆنفەرانسەکە رۆژنامەڤانی دە راگهاند، “ئەم ب سەرۆکێ پارلامەنتۆیا ترکیەیێ رە جڤیان. مە بەحسا قۆناغێن نها یێن پێڤاژۆیا ئاشتیێ کر و مە ل سەر قۆناغێن کو ئەو پێڤاژۆ نها گهیشتیێ نێرینێن خوە ل هەڤ گوهەرتن”.
وێ ئەنداما شاندا ئیمرالیێ تەکەز ژی کر، “جڤینا مە یا ب سەرۆکێ پارلامەنتۆیا ترکیەیێ رە د چارچۆڤەیەکە پر ئەرێنی دە دەرباس بوو. سەرۆکێ پارلامەنتۆیێ بەرپرسیاریا خوە یا ل بەرانبەری وێ پێڤاژۆیێ نیشان دا و ئەڤ ژی پر گرینگە.” هەروەسا گۆت، “پێڤاژۆیا ئاشتیێ گهیشتیە قۆناغەکە گرینگ، لەوما دڤێ ل سەر بنگەها دیالۆگ و پارلەمەنتۆیێ پێش بکەڤە”.
ئەنداما ناڤبری ئاماژە ژی دا کو، ئەو دێ هەر ژ بۆ پێڤاژۆیا نوو یا ئاشتیێ د یەک دو هەفتەیان دە ب رێبەرێ پارتیا کارکەرێن کوردستانێ (په‌كه‌كێ) یێ زیندانکری عه‌بدوللا ئۆجالان، سەرۆککۆمارێ ترکیەیێ رەجەپ تاییپ ئەردۆگان، سەرۆکێ پارتیا تەڤگەرا نەتەوەیی یا ترکیەیێ (مه‌هه‌پێ) دەڤلەت باخچه‌لی و سەرۆکێ پارتیا گەلا کۆماری (جه‌هه‌پێ) ئۆزگور ئۆزەل رە بجڤن.
هەتا نها شاندا دەم پارتیێ پێنج جاران ب ئۆجالان و جارەکێ ژی ب ئەردۆگان رە جڤیایە دا کو ل سەر پێڤاژۆیا نوو یا ئاشتیێ ل ترکیە و باکورێ کوردستانێ گەنگەشەیان بکن. سەرۆککۆمارێ ترکیەیێ رەجەپ تاییپ ئەردۆگان دوهی (چارشەم، 25.06.2025) د کۆنفەرانسەکە رۆژنامەڤانی دە راگهاند کو، شاندا ئیمرالیێ داخوازا جڤینێ ژ وی کریە و ئەو دێ د دەمەکە نێزیک دە ب وان رە بجڤە.
