کۆمپانیایا ئامەریکی “ماخار” دوھ رۆژا ئینی ھەژمارەک وێنەیێن سەتەلایتێ یێن ناڤەندا ئاتۆمی یا فۆردۆیێ یا ئیرانێ بەلاڤ کرن. د وێنەیان دە دیار دبە کو چالاکیێن ل ناڤەندێ، ب ئاوایەکی سنۆردار، ژ نوو ڤە دەست پێ کرنە.
د وێنەیێن نوو یێن سەتەلایتێ دە، تەڤگەرا ل دەردۆرا دەریێن کو بەرێ ژ ئالیێ ئامەریکایێ ڤە ھاتبوون بۆمبەبارانکرن، تێ دیتن. ئۆتۆمۆبیل و ئاموورێن ئاڤاھیسازیێ ل نێزی دەرگەھێن کۆمپلەکسێن بنەردی ھاتنە دیتن. ھەروھا ھات راگھاندن کو ئاموورەکێ مەزن یێ کۆلاندنێ و بولدۆزەرەک ل ناڤەندا ئەتۆمی یا فۆردۆیێ ھاتنە دیتن.
تۆرا “CNN” ل سەر زارێ پسپۆرێ چەکان و پرۆفەسۆرێ ل ئەنستیتویا لێکۆلینێن ناڤدەولەتی یا مدلبورێ، جێفری لویس راگھاند، وێنەیێن سەتەلایتێ نیشان ددن کو ئیرانێ ل تونەلێن ئیسفەھانێ ژی دەست ب کاری کریە. لویس گۆت: “رۆژا 26ێ خزیرانێ، ھەژمارەک ئۆتۆمۆبیل ل ناڤەندا ناڤۆکی یا ئیسفەھانێ ھەبوون،” و دەستنیشان کر کو “ھەتا بەربانگا 27ێ خزیرانێ، ئاستەنگیێن ل بەر یەک ژ دەریێن تونەلان ھاتبوون راکرن.”
جێفری لویس ھەروھا گۆت کو وێنەیەکی دن یێ کو د 27ێ خزیرانێ دە ژ ئالیێ کۆمپانیایا “پلانەت لابس” ڤە ھاتیە کشاندن، نیشان ددە کو دەریێن تونەلان ڤەکری بوونە.
ئەڤ گەشەدان پشتی وێ یەکێ تێ کو چەند رۆژان بەری راگھاندنا ئاگربەستا د ناڤبەرا ئیسرایل و ئیرانێ دە، سێ فرۆکەیێن ب-2 یێن ئامەریکی ئێریشی ناڤەندا فۆردۆیێ کربوون. ئەڤ ناڤەند ل بن چیایەکی، ب کووراھیا نێزیکی 300 پی (90 مەترە) ھاتیە ئاڤاکرن. دەربارێ ڤێ یەکێ دە، سەرۆکێ ئامەریکایێ دۆنالد ترامپ گۆتبوو: “مە ناڤەندێن نەتەنز، فۆردۆ و ئیسفەھانێ ب تەمامی ژ ھۆلێ راکرنە.”
ل گۆری چاڤکانیان، تەڤی کو ئاژانسا ئیستخباراتا ئامەریکایێ راگھاندیە کو زیانەکا مەزن گھیشتیە جھێن ناڤۆکی یێن ل سەر ئەردێ و زەحمەتە ئیران خوە بگھینە یوورانیوما د بن ئەردێ دە، ناڤەندا فۆردۆیێ وەکە یەک ژ جھێن ھەری ھەستیار و ستراتەژیکێن ئیرانێ ژ بۆ زەنگینکرنا یورانیومێ تێ زانین.
