سەرۆکۆمارێ ترکیێ رەجەپ تاییپ ئەردۆگان دلخوەشیا خوە ب برێڤەچوونا پرۆسەیێ ئانی زمان، لێ هشیاری دا کو هن ئالی هەول ددن پرۆسەیێ تێک ببن. ل ئالیێ دن، پارتیا وەکهەڤی و دەمۆکراسیێ یا گەلان (دەم پارتی) رادگهینە، ئەگەر هەیە په‌كه‌كه د ناڤا هەفتەیا بێ دە دەست ب پرۆسەیا چەکدانینێ بکە و تەکەزی ل سەر پێویستیا بنگەهەکە یاسایی دکە.
پشتی جڤینا کابینەیا حکوومەتا ترکیێ، سەرۆکۆمار رەجەپ تاییپ ئەردۆگان دەربارێ پێشهاتێن داوی دە ئاخڤی. ئەردۆگان دیار کر کو ئەو ژ شێوازا برێڤەچوونا پرۆسەیێ رازینە و هەموو ئاکتەرێن سیاسی ب بەرپرسیاری تەڤدگەرن. لێ بەلێ، وی هشیاری دا کو ل هوندرێ ترکیێ و د ناڤا په‌كه‌كێ دە هن کەس ناخوازن پرۆسە ب سەر بکەڤە.
ئەردۆگان گۆت: «پێشهاتێن داوی یێن ناڤچەیێ ژی نیشان دان کو ئەڤ پرۆسە چقاس گرینگ و ستراتەژیکە. ئەم دزانن هن ئالی هەنە سەرکەفتنا پرۆسەیێ ناخوازن. نە تەنێ ل ترکیەیێ، د ناڤا رێخستنێ دە ژی هن کەس هەول ددن پرۆسەیێ تێک بدن. دەولەتا مە ناکەڤە ڤان خەفکان و ئەم رێ نادن تەکدانا پرۆسەیێ. دەما ئێرش ل مە وەرە کرن و هەمبەری یەکیتیا نەتەوەیا مە ئێرش وەرە کرن، ئەمێ بەرسڤەکە توند بدن. بلا ت ئالیەک سەبرا مە، بێدەنگی و خوینساریا مە شاش تێنەگهە. ئەوێن کەڤران باڤێژن جامێ مە، بلا بزانن، ئەم دکارن گولە باڤێژن و ئەو هێزا مە هەیە».
دەم پارتی: یا گرینگ بنگەها یاسایییە
ژ ئالیێ خوە ڤە، جیگرێ سەرۆکێ فراکسیۆنا دەم پارتیێ سەزایی تەمەڵی راگهاند، ئەو ل بەندێنە شاندا ئیمرالیێ د 8 ئان 9ێ تیرمەهێ دە ب سەرۆکۆمار ئەردۆگان رە بجڤە. تەمەڵی دا زانین کو ئەو چاڤەرێ دکن هەفتەیا بێ پرۆسەیا چەکدانینا په‌كه‌كێ دەست پێ بکە، لێ تەکەز کر کو یا هەری گرینگ ئامادەکرنا بنگەهەکە یاسایییە ژ بۆ پرۆسەیێ.
تەمەڵی گۆت: «پرسا پێکانینا کۆمیسیۆنێ، د پرۆسەیا چارەسەری دە قۆناغەکە گرینگە. ئەمێ ب هەموو هەبوونا خوە پشتگری بدن کارێن کۆمیسیۆنێ. په‌كه‌كێ د کۆنگرەیا خوە دە بریارا چەکدانینێ دا. هەفتیا بێ ئەم چاڤەرێ دکن چەکدانینێ دەستپێ بکە. لێ یا گرنگ چێکرنا بنگەها یاسایییە».
ل گۆری زانیاریێن د مەدیایا ترکیێ دە هاتنە بەلاڤکرن، ئامادەکاریێن په‌كه‌كێ ژ بۆ پێنگاڤا چەکدانینێ ددۆمن. تێ پایین کو وەک پێنگاڤا دەستپێکێ، گرووپەکە ژ 20 گەریلایان پێک تێ، ل سەر سینۆرێ پارێزگەها سلێمانیێ و ل بەر چاڤێ کامەرایێن مەدیایا ناڤدەولەتی چەکێن خوە دەینن. تێ گۆتن کو ئەڤ پێنگاڤ دێ باندۆرەکە مەزن ل سەر پرۆسەیێ بکە و حکوومەتێ ژی تەشویق بکە کو گاڤێن یاسایی یێن پێویست باڤێژە.
