بەردەڤکێ وەزارەتا کارێن دەرڤە یا ئامەریکایێ راگهاند کو دڤێ کارێن خەتا بۆریا پەترۆلێ یا د ناڤبەرا ئیراق و ترکیەیێ دە د دەمەکە کورت دە ژ نوو ڤە دەست پێ بکن.
بەردەڤکی هەر وها گۆت گرتیمایینا خەتێ ئابۆریا ئیراق و هەرێما کوردستانێ لاواز دکە و راستەراست زرارێ ددە کۆمپانیێن ئامەریکی.
ل سەر پرسا پەیامنێرێ رووداوێ یا «گەلۆ د دەما داوی دە دەربارێ مژارێن بودجە، پەترۆل و گازێ دە ت تێکلیەکە وە ب هەولێر و بەغدایێ رە چێبوویە؟ وە ژ بۆ هێسانکرنا دیالۆگا د ناڤبەرا هەر دو ئالیان دە ت رۆلەک لیستیە؟» بەردەڤکێ وەزارەتا کارێن دەرڤە یا ئامەریکایێ وها بەرسڤ دا:
گەلەکی گرینگە کو حکوومەتا ئیراقێ، حکوومەتا هەرێما کوردستانێ و ئالیێن دن یێن پێوەندیدار ب لەزگینی خەتا بۆریا پەترۆلێ یا ئیراق-ترکیەیێ ژ نوو ڤە بخن دەورێ.
گرتیمایینا خەتێ راستەراست باندۆرێ ل سەر کار و چالاکیێن سێ کۆمپانیێن ئامەریکی دکە.
ئەڤ یەک نایێ قەبوولکرن. مە گەلەک جاران بانگ ل هەموو ئالیان کریە.
دڤێ ئەو پرسگرێکێن خوە چارەسەر بکن و ئەم پاشخستنەکە بێدەم قەبوول ناکن.
بەردەڤکێ وه‌زاره‌تێ دیار کر کو گرتیمایینا خەتا بۆریێ نە تەنێ بپێشکەتنا ئابۆریێ یا ئیراقێ رادوەستینە، د هەمان دەمێ دە پێگەها کۆمپانیێن ئامەریکییێن ل هەرێمێ لاواز دکە و رێ ل بەر زێدەبوونا باندۆرا ئیرانێ ڤەدکە.
بەردەڤکێ وه‌زاره‌تێ گۆت، دڤێ ئەڤ پرس وەرە چارەسەرکرن، د دەمەکە هەری کورت دە ژی.
بۆریا پەترۆلێ یا ئیراق-ترکیەیێ رێیەکە ئالتەرناتیفا گرنگ ژ بۆ گهیشتنا پەترۆلێ بۆ بازارێن جیهانی دابین دکە، کو سوودێ دگهینە ئابۆریا ئیراقێ و هەرێما کوردستانێ، هەروها وان کۆمپانیێن ئامەریکی یێن کو ل ور کار دکن.
ڤەکرنا وێ دێ سوودێ بگهینە ئامەریکا، هەرێما کوردستانێ، ئیراقا فەدەرال و هەرێمێ ب گشتی.
