د چارچۆڤەیا ئۆپەراسیۆنەکا بەرفرەھ دە، سەرۆکێ شارەداریا باژارێ مەزن یا ئەدەنەیێ زەیدان کارالار و سەرۆکێ شارەداریا سەمسوورێ عەبدوڕەحمان توتدەرە ھاتن دەستەسەرکرن. ھەر دو سەرۆک شارەداری ژی ئەندامێن پارتیا گەل یا کۆماری (جەهەپێ) نە.
ل گۆری ئاگاھیان، لێپرسین ژ ئالیێ سەردۆزگەریا کۆماری یا ستەنبۆلێ ڤە تێ برێڤەبرن و ئیدیعایان دکە کو رێخستنەکا تاوانان یا ب سەرکێشیا ئازیھسان ئاکتاش، ب دایینا بەرتیلێ ب سەرۆکێن شارەداریان و رێڤەبەرێن پایەبلند، ئیحالەیێن گشتی ژ بۆ خوە رێکخستینە.
ھات زانین، پشتی ئیفادەیێن نوو یێن شاھدان و ھندەک گومانبارێن گرتی، لگەل بەلگەیێن کو ھاتنە پێشکێشکرن، دەربارێ کارالار و توتدەرە دە بریارا دەستەسەرکرنێ ھاتیە دایین.
د ھەمان دەمێ دە، تیمێن شاخا تێکۆشینا ل دژی قاچاخچیتی و تاوانێن رێکخستی یا رێڤەبەرییا ئەولەهییا ئەدەنەیێ، دەست ب لێگەرینێ ل ئاڤاھیا شارەداریا باژارێ مەزن یا ئەدەنەیێ و ل مالا سەرۆکێ شارەداریێ زەیدان کارالار کرن.
ل دەردۆرا ئاڤاھیا شارەداریێ ھەژمارەکا مەزن یا پۆلیسان تەدبیرێن توند یێن ئەولەھیێ گرتنە.
