ئۆزەل پشتی بنچاڤکرنا شارەدارێن جەهەپێ: ل ھەمبەری سیاسەتا دەمۆکراتیک شەر ھاتیە راگھاندن

سەرۆکێ گشتی یێ جەهەپێ ئۆزگور ئۆزەل، پشتی کو دوھ 3 سەرۆک شارەدارێن پارتیا وی ھاتن بنچاڤکرن، داخویانیەکە توند دا. ئۆزەل گۆت، دەستھلاتداری ب ڤان ئۆپەراسیۆنان ئامادەکاریێ دکە کو سندۆقان ژ ھۆلێ راکە و دیکتاتۆریێ جیبجی بکە.

پشتی پێلا ئۆپەراسیۆنێن ل دژی شارەداریێن جەهەپێ، سیاسەتا ترکیەیێ جارەکە دن گەرم بوو. سەرۆکێ گشتی یێ پارتیا گەل یا کۆماری (جەهەپێ) ئۆزگور ئۆزەل، ب داخویانیەکێ کارڤەدانا توند نیشانی بنچاڤکرنا شارەدارێن پارتیا خوە دا و حکوومەت ب ئامادەکاریا “راکرنا سندۆقان” تاوانبار کر.

3 شارەدارێن باژاران ھاتن بنچاڤکرن

دوھ، 5ێ تیرمەھێ، د چارچۆڤەیا لێپرسینەکێ کو ژ ئالیێ سەردۆزگەریا کۆماری یا ستەنبۆلێ ڤە دھات مەشاندن دە، ئۆپەراسیۆنەک ل دژی شارەداریێن جەهەپێ ھات لدارخستن. د ئەنجاما ئۆپەراسیۆنێ دە سەرۆکێ شارەداریا باژارێ مەزن یا ئەدەنەیێ زەیدان کارالار، سەرۆکێ شارەداریا سەمسوورێ عەبدوڕحمان توتدەرە و سەرۆکێ شارەداریا باژارێ مەزن یا ئانتالیایێ موھتن بۆجەک ھاتن بنچاڤکرن.

ئۆزەل: ل ھەمبەری سیاسەتا دەمۆکراتیک شەر ھاتیە راگھاندن

ل سەر ڤێ پێشکەتنێ، سەرۆکێ گشتی یێ جەهەپێ ئۆزگور ئۆزەل پشتی جڤینا دەستەیا رێڤەبەریا پارتیا خوە داخویانی دا چاپەمەنیێ. ئۆزەل دیار کر، دەستھلاتداریێ نە تەنێ ل ھەمبەری جەهەپێ، لێ ل ھەمبەری سیاسەتا دەمۆکراتیک شەر راگھاندیە و گۆت:

“دەستھلات ژ سندۆقێن و ھلبژارتنێ دترسە و دخوازە ب فشاران ھەتا ھلبژارتنێ بەردەوام بە. د ناڤا دەستھلاتێ دە بەشەک کەسان، سێ دۆزگەر، سێ دادوەر و سێ شاھدێن نەھێنی گرتنە با خوە و ژ 19ێ ئادارێ ڤە ھەمبەری ملەتی شەر راگھاندنە. ئەڤ شەر نە تەنێ ھەمبەری مەیە، ھەمبەری سیاسەتا دەمۆکراتیکە.”

سەرۆکێ جەهەپێ ھەروھا گۆت، ئارمانجا داوی یا دەستھلاتێ راکرنا سندۆقان و ئاڤاکرنا دیکتاتۆریەکێ یە و گۆت، “ئێدی دخوازن سندۆقێ راکن، ئامادەکاریێن ڤێ دکن، دخوازن دیکتاتۆری جیبجی بکن. تشتێن کرنە ھنجەتێ ئۆپەراسیۆنان بێبنگەھن.”