وەزارەتا دەرڤە یا ئامەریکایێ ب بریارەکێ راگھاند، وان دەستەیا ھەیئەت تەحریر ئەل-شام (هەتەشە)، کو بەرێ وەک جەبھەت ئەل-نوسرە دھات ناسکرن، ژ لیستەیا خوە یا “رێخستنێن تەرۆریست” دەرخستیە.
د بریارا فەرمی دە ھات گۆتن، “پشتی شێورا لگەل دۆزگەرێ گشتی و وەزیرێ خەزینەیێ، ل گۆری ڤێ بریارێ، جەبھەت ئەل-نوسرە، کو وەک ھەیئەت تەحریر ئەل-شام و ب ناڤێن دن ژی تێ ناسکرن، وەک رێخستنەکا تەرۆریستی یا بیانی دهێت ھلوەشاندن.”
د داخویانیێ دە ھات دەستنیشانکرن، ئەڤ پێنگاڤە ل گۆری بەندا 219ێ یا یاسایا کۆچبەری و وەلاتیبوونێ یا ئامەریکایێ ھاتیە ئاڤێتن.
وەزارەتا دەرڤەیا ئامەریکایێ د بەرچلەیا 2012ێ دە “جەبھەت ئەل-نوسرە” خستبوو لیستەیێ، بەری کو رێبەرێ وێ ئەبوو محەمەد ئەل-جۆلانی ناڤێ وێ ژ بۆ “ھەیئەت تەحریر ئەل-شام” بگوھەرینە.
د 8ێ بەرچلەیا سالا بۆری دە، هەتەشە ب سەرۆکاتیا جۆلانی (ئەحمەد شەرع) ئێریشەکا بەرفرەھ دا دەستپێکرن کو د ئەنجامێ دە رەژیما بەشار ئەسەد ھلوەشیا. پشتی ڤان گەشەدانان، جۆلانی کو پاشێ ب ناڤێ خوەیێ راستی ئەحمەد شەرع ھات ناسکرن، ژ بۆ ھەیاما 5 سالان سەرۆکاتیا سووریەیێ گرت سەر ملێ خوە.
ئەڤ بریارە د دەمەکێ دە تێ، سەرۆکێ ئامەریکایێ دۆنالد ترامپ د گولانا بۆری دە، د سەردانا خوە یا عەرەبستانا سعوودی دە، لگەل ئەحمەد شەرع جڤیا و راگھاندبوو کو سزایێن ل سەر سووریەیێ ھاتنە راکرن. ترامپ تەکەز کربوو کو ئەڤ پێنگاڤە ل سەر داخوازا میرێ جیگر محەمەد بن سەلمان پێک ھاتیە.
