سەرۆکێ پارتیا “زەفەر” سەرکەفتنێ ، ئۆمید ئۆزداگ تەڤلی کۆنگرەیا پارتیا خوە یا پارێزگەھا ئاکسارایێ بوو. ئۆزداگ د ئاخاڤتنا خوە یا کۆنگرەیێ دە بەحسا فەرمیکرنا زمانێ کوردی کر.
ئۆزداگ دیار کر کو ئەو ل دژی وێ یەکێ نە کو زمانێ کوردی ببە زمانێ پەروەردەھیێ و نابە رێ ب چ زانینگەھان بهێت دایین ب زمانێ کوردی پەروەردەیێ بکن.
ئۆزداگ گۆت، “ما ئەم دێ دیرۆکا ترکیێ ب کوردی فێر بن؟ ما ئەم دێ ئەدەبیاتا ترکی ب کوردی فێر بن؟ خوەندەکارەک کو ژ دبستانا سەرەتایی ھەتا ناوەندییێ ب کوردی پەروەردەھیێ دبینە، دێ چاوا د ئەزموونا زانینگەھێ دە ب سەر بکەڤە؟”
ئۆزداگ ھەر وھا گۆت، “ما ھوونێ ژ بۆ ڤێ یەکێ زانینگەھەکا کوردی یا جودا ڤەکن؟ ئەڤە پرۆژەیەکە کو نەتەوەیا ترک پارچە بکە و ب چاڤکانیێن دەولەتێ نەتەوەیەک دن ل سەر ئاخا ئاناتۆلیێ مەزن دکە.”
ئۆزداگ گۆت: ئەو کەسێن کو دبێژن “دەستوورا کو د بن چاڤدێریا ھێزێن چەکدارێن ترکیەیێ دە ھاتیە چێکرن” و ل دژی دەستوورا بنگەھین یا 1982 دەردکەڤن، نھا پلان دکن کو د بن چاڤدێریا پەکەکێ و ئۆجالان دە دەستوورەک نوو چێبکن.”
