لەیلا زانا: کاک مەسعوود و کاک نێچیرڤان ئالیکاریەکا مەزن کر

سیاسەتمەدارا کورد لەیلا زانایێ ل زاخۆیێ ژ بۆ رۆژنامەڤانان گۆت، “رۆلا کاک مەسعوود و کاک نێچیرڤان پر زێدە بوو. وان ئالیکاریەکا مەزن کر.”

سیاسەتمەدارا کورد ژ بۆ شاھدیا مەراسیما چەکدانینا پەکەکێ ھات ھەرێما کوردستانێ.

زانا ل زاخۆیێ ژ بۆ رۆژنامەگەرێن کورد ئاخڤی.

سیاسەتمەدارا کورد راگھاند، 100 سالن زۆرداری ل کوردان تێ کرن و 100 سالن ژی کوردان بەرخوەدان کریە و گۆت، “دڤێت ئێدی یاسایا تەرۆرێ بهێت گوھەرتن و ئەز قەبوول ناکم کو کورد ب تەرۆرێ بێن تۆھمەتبارکرن.”

لەیلا زانایێ دا زانین کو د سەدسالا بۆری دە ھەر دو ئالیان ژی گەلەک تشت وندا کرنە و گۆت:

“100 سالن زۆرداری ل کوردان تێ کرن و 100 سالان ژی کوردان بەرخوەدان کر. نە ئەم تێک چوون نە ژی یێن کو ل مە دان تێک چوون.

د ڤێ سەدسالا 21ێ دە ئەم دبێژین، بلا نە ئەم، نە شریکێن مە و نە ژی گەلێن بندەست تشتەکی وندا نەکن.”

زانایێ ژ بۆ چارەسەریێ بانگا بکارئانینا “زمانەکی رەحمانی” کر و وھا دۆماند:

“خەرابکرن ھێسانە لێ ئاڤاکرن کەد و خوێدانێ دخوازە. ئەم ژی دخوازین ئیرۆ تشتێن باش بهێنە ئەنجامدان. ئیرۆ ل جیھانێ ھەموو کەس ب گومان نێزیکی ھەڤ دبن و ب زمانێ توندیێ دئاخڤن.

ئەم دبێژین بلا کوردستان ببە نموونە.”

ئەو تشتێن کو کال و پیرێن مە، باب و دایکێن مە و مە کشاند، بلا نفشا ل دویڤ مە نەکشینە. ل شوونا ئێشێ ئێدی بلا شاھی چێببە، پەیاما من ئەڤە.”

لەیلا زانایێ دیار کر کو ئەو 7 سالن نەچوویە کوردستانێ و وێ بێریا کوردستانێ کریە. وێ سەرۆک مەسعوود بارزانی و سەرۆکێ ھەرێما کوردستانێ نێچیرڤان بارزانی ژی ب بیر ئانی و گۆت:

“رۆلا کوردستانێ گەلەکی زێدەیە. وێ رۆلێ ب رەحم و منەت ب بیر تینم. رەحمەتیێ مام جەلال سالا 1993 ل شامێ دەست پێ کر.

د سالا 2013 دە رۆلا کاک مەسعوود و کاک نێچیرڤان پر زێدە بوو. وان ئالیکاریەکا مەزن کر

“ژ ئیرۆ پێ دە چ کەس نکارە بێژە کو کورد نینن”

ئەز دکارم بێژم ئیرۆ زێدەتر کار دکن. ئەڤ 2 سالن د وارێ دیپلۆماسیێ دە کار دکن و ئەز باوەر دکم کو دێ ژ ئیرۆ پێ دە ژی ئەرکێن خوە ب جھ بینن.”

سیاسەتمەدارا کورد بال کشاند سەر یەکیتیا کوردان و گۆت:

“نە دەما وێ یەکێیە کو ئەم بەحسا بیردۆزیا خوە بکن. دڤێت د سەری دە ئەم ھەبن. دڤێت پێشی ئەم خوە ناس بکن. ڤێ سەدسالێ گەلەک تشت نیشانی ھەر کەسی دان. ژ ئیرۆ پێ دە چ کەس ل قادا جیھانێ نکارە بێژە کو کورد نینن.”

زانایێ دەستنیشان کر کو شێوازا تێکۆشینێ ھاتیە گوھەرتن و گۆت:

“ھەر تشت نەقەدیایە، ئەڤ دەم دێ گاڤ ب گاڤ بمەشە. ژ بۆ من یا گرینگ و ھەری مەزن ئەوە کو ئیرۆ چ کەس نکارە بێژە کو کورد نینن. ئەز ھێڤی دکم ئەم ھەموو ژ ھەڤ را ببن ئالیکار دا کو گەلێ مە بگھیژە حەقێ خوە.”

لەیلا زانایێ د داویا ئاخافتنا خوە دە گۆت، “پێویستە ئێدی یاسایا تەرۆرێ بهێت گوھەرتن و ئەز قەبوول ناکم کو کورد ب تەرۆرێ بێن تۆھمەتبارکرن.

پێویستە کۆمیسیۆن کار بکە دا کو ئێدی ھەم جیرانێن مە ھەم ژی ئەم ژ تەنگاسیان خلاس ببن.”