د 11ێ تیرمەھێ دە، 30 گەریلایان چەکێن خوە شەوتاندن. ئەز ب خوە گەریلایەکی دێرینم. من ئەو چەکێن ھاتی شەوتاندن تام 20 سالان ھلگرت. و دەما کو گەریلا ژ وێ شکەفتێ داکەتین، بیرئانینێن من ل بەر چاڤێن من وەکە فلمەکێ بۆرین. و ئەز دخوازم ھەستێن کو ئەز ئیرۆ دژیم ب ڤێ نامەیێ ڤەبێژم.

من ئەڤ نامەیە ل سەر ناڤێ نفشێ سالێن 1990ێ یێن بێ گۆر نڤیساندییە.

من ئەڤ نامەیە ژ بۆ مالباتێن کو د شەرێ 41 سالان دە بەدەل دانە و پەرچە-پارچە بوونە نڤیساندییە.

من ئەڤ نامەیە ژ بۆ یێن ئێش کشاندی و خوەدی کەد کا دێ حەقێ خوە ل وە حەلال بکن و ژ کێ رە حەلال ناکن نڤیساندییە.

ئەز حەقێ خوە ل گەلێ کوردستانێ، ژ ھەڤسەنگەرێن خوە، ھەموو جانگۆرییان و یێن کو هێژ ژی د دلێ وان دە باوەریا کوردستانا ئازاد و سەربخوە ھەیی حەلال دکم. لێ بەلێ، ئەز وان کەسێن کو رێیا کو مە ژ بۆ کوردستانا ئازاد-سەربخوە ڤەکریە بەر ب “مەزنبوونا کۆمارا ترکیەیێ و پاراستنا سینۆرێن پەیمانا لۆزانێ” ڤە دگوھەرینن حەلال ناکم. ئەز حەقێ خوە ل ئۆجالان ژی حەلال ناکم.

پشتی سالێن 1990ێ، سێ نفشێن جوانێن کوردان ژ بۆ ئاڤاکرنا کوردستانەکا سەربخوە تەڤلی پەکەکێ بوون. ئەز یەک ژ وان بووم. من جوانیا خوە، دبستانا خوە، دایکا خوە یا کو ب ئەڤینا وێ ئەز دمرم، مالباتا خوە و کەچا کو من ئەوقاس ژێ حەز دکر ل دویف خوە ھشتن.

نفشێ من سترانا “کینە ئەم- کوردین ئەم” یا شڤان پەروەر دسترا کو مە ب دزی ڤە گوھداری دکر و مە ژێ حەز دکر.

ئەم ب گوھدارییا چیرۆکێن بەرخوەدانا ل دژی ئیشکەنجەیا د زیندانێن دیاربەکرێ دە مەزن بوون. ئەز د سالا 1988ێ دە بووم شاهدحالێ جینۆسایدا حەلەبچەیێ و بووم شاھدحالێ راپەرینا مەزنا 1991ێ یا گەلێ باشوورێ کوردستانێ. کو وەکە بابەلیزکەکێ باندۆرا خوە ل تەڤاھیا کوردستانێ کربوو. ب وێ ھێرسێ، مە د سالا 1992یێ دە ل دژی پانزەر-زریپۆش و گولەیان ب درووشمێن “بژی کوردستان، بمرە کۆلەدار” دەست ب خەباتێ کر. دەما کو مە دەست ب زانینگەھێ کری، مە د خوەپێشاندانێن دبستانان دە سترانا “وێ بینە وێ بینە، پەکەکە وێ ژ مە رە دەولەتێ بینە” دسترا و بێترس مە تف دکر روویێ دژمنی. و د داویێ دە ب ڤان ھەستا، ئەم تەڤلی پەکەکێ بوون.

مە قەت وێنەیەکی ئۆجالان ژی نەدیتبوو. ئەم ژ بۆ کوردستانێ تەڤلی پەکەکێ بوون. د پەروەردەھیا مە دە، ژ مە رە ھات گۆتن کو ئۆجالان یەکانە وەلاتپارێزێ دیرۆکا کوردستانێ یە. ل گۆری پەروەردەھیێ، شێخ سەعید ئاژان بوو، قازی محەمەد بەلەنگاز بوو، و مەلا مستەفا بارزانی ژ بۆ ئیسرایلێ دخەبتی. ئەم ماتمایی مان، مە دگۆت ئەڤ پەکەکەیا مەزن ل مە دەرەوان ناکە لۆما ژی ئەم بێدەنگ دمان.

د سالا 1995ێ دە، ئەم ھاتین باشوورێ کوردستانێ. ژ مە ھات خوەستن کو ئەم ل دژی بارەگەھەکا پێشمەرگە چالاکیێ بکن. مە گۆت، “ئەو ژی کوردن، ئەو نوو ژ زلما سەدام رزگاربوونە.” ژ مە رە ھات گۆتن، “ھوون نزانن، ئەو پاشڤەروونە، ئەو دەولەتەکا سەربخوە یا کوردی ناخوازن؛ ئەو ئۆتۆنۆمیەکا بچووک دخوازن. ھەیا کو ئەم وان تونە نەکن، کوردستان نایێ دامەزراندن.”

ژ مە ھات خوەستن کو ئەم ھەرن بارزان و گوندان بشەوتینن. ھەڤالەکی من پرسی، “ئەم چما ڤان بارزانیان، یێن ژ ئەنفالێ ساخ مایی، دکوژین؟” لێ فەرمان دژواربوو، ژ بەر ڤێ یەکێ مە ئەو گوند شەوتاندن.

د سالا 1999ێ دە، مە بھیست کو ئۆجالان بریە ترکیەیێ. بێ گومان، ئۆجالان دێ ل سەر خەتا بندەستان ل بەر خوە بدە. لێ ئۆجالان گۆت، “ئەز دخوازم خزمەتا دەولەتا خوە یا ترک بکم.”  ئۆجالان ب قاسی مسقالەکێ وێرەکیا کو ژنێن جوان یێن کو خوە تەقاندن نیشان نەدا. ڤێ جارێ ژی، ژ مە رە ھات گۆتن، “ھوون فێم ناکن؛ سەرۆک ب ئاوایێ کلاسیک ل بەر خوە نادە.”

د سالا 1999ێ دە، گەریلایێن باکورێ کوردستانێ ب فەرمانا ئۆجالان بێ ئامادەکاری ھاتن باشوور. ب سەدان ھەڤالێن من ل کێلەکا من شەھید بوون.

د سالا 2000 دە، ژ مە رە ھات گۆتن کو ئەم دێ “لگەل پێشمەرگەیێن یەنەکێ شەری بکن”. ژ بەر کو ئۆجالان دخوەست ژ بۆ دەولەتا ترکیەیێ ئیسپات بکە کو پەکەکە دێ گوھ بدە وی، تەعلیمات ژ ور ھاتن. مە پتر ژ 200 پێشمەرگەیێن یەنەکێ شەھید کرن.

جوانێن کورد، کو د سالێن 1990ێ دە ژ بۆ ئاڤاکرنا وەلاتەکی ئازاد دەست ب تەکۆشینێ کرین، نھا ژ ئالیێ ئۆجالانێ کو دبێژە “ئەز دخوازم خزمەتا دەولەتا ترک بکم” ڤە دھاتنە ژ ناڤبرن.

د نامەیا خوەیا 27ێ سباتێ دە، ئۆجالان راگھاند، “شەرێ پشتی سالێن 1990ێ نەحەوجە بوو.” وێ دەمێ چما د سالێن 1990ێ دە ئەوقاس گوند ھاتن شەوتاندن، چما ب ملیۆنا کورد مەجبوور مان کۆچبەر ببن، چما د وێ دەمێ دە 40 ھەزار جوانێن کورد ژییانا خوە ژ دەست دا؟

چما ئۆجالان د 1ێ خزیرانا 2004ێ دە شەر ژ نوو ڤە دا دەستپێکرن؟ ژ وێ دەمێ ڤە، 20.000 جوانێن کورد کەتن گۆرێ. چما،چمااا؟

چما ئۆجالان د سالا 2013ێ دە دەرکەت و گۆت، “رێڤەبەریەک خوەسەر دکارە خوەسەرییا ھەرێمی راگەھینە، و 50.000 کورد دکارن د رۆژەکێ دە بمرن،” و وە د 11 باژارێن کوردان دە نێزیکی سێ ھەزار گەریلا ئاڤێتن ناڤ خەندەکان و ئەو ب دەستێ دەولەتا ترک دان کوشتن؟

خوینا 50.000 ھەزار جەنازەیان ل سەر دەستێ ئۆجالانە.

پەکەکێ د 41 سالێن شەری دە تشتەک بەربچاڤ ب دەست نەخستیە. ئیدیعایا کو “مە ناسنامەیا کورد دا قەبوول کرن” دەرەوە. بەری کو ناڤێ پەکەکێ ببھیزین ژی ئەم کورد بوون. کوردبوونا مە وێ دەمێ ت پەیوەندییا وێ ب ئۆجالان ڤە تونە بوو، و نھا ژی تونەیە.

ئۆجالان چ مەبەستەکا کورد و کوردستانی نینە. وی ب ھەزاران جوانێن کورد تەنێ ژ بۆ تێرکرنا زکێ خوە رێکرن سەر مرنێ. رێبەرێن پەکەکێ یێن وەکی جەمیل بایک، موراد قارایلان، دوران کالکان، مستەفا قاراسوو و عەلی حەیدەر قەیتان ژی ڤێ چەرخا دژی-کوردان دزڤرینن.

ئەز ب دل و جان داخواز دکم کو چەک بێن دانین. جوانێن کورد ئێدی نەمرن. ئەز ژ ئۆجالان و ئالیگرێن وی رە حەقێ خوە حەلال ناکم. بلا خوینا 50 ھەزار جوانێن کورد ژی حەلال نەبە.