ژییانا عەڤدللا ئۆجالان و گومان و خالێن تاری یێن ل دۆرا وێ پر جاران تێنە نیقاشکرن. زەواجا وی لگەل کەچا پەرپرسەکی متێ، و پاشێ بەشداربوونا ھەڤالێن وی یێن ھەری نێزیک د میتێ دە، د ناڤ پرسێن کو پر جاران تێنە نیقاشکرن و لێگەرین دە نە.
ھەتا نھا گەلەک بەلگە د دەربارێ پەیوەندیێن ئۆجالان لگەل میتێ ھاتنە پارڤەکرن. یەک ژ ڤان بەلگەیان داخویانیێن رۆژنامەڤانێ ترک عەونی ئۆزگوورەلە.
عەونی ئۆزگوورەل: من ئۆجالان ل ناڤەندەکا میتێ دیت
عەونی ئۆزگوورەل، وەکە ئەندامەکی راستگرێ ترکیەیێ و ب پەیوەندیێن خوە یێن لگەل میتێ تێ ناسین، ئەو یەک ژ وان کەسانە کو ئیدیعا دکە ئۆجالان لگەل میتێ کار کرییە. ب راستی، ئۆزگوورەل ئەو کەسە کو ئیدیعا دکە ئۆجالان راستەراست ل ناڤەندەکا میتێ دیتیە. و ئۆزگوورەل نە تەنێ نها ڤێ یەکێ دبێژە؛ ئەو ژ سالا 1993ێ ڤر ڤە ڤێ یەکێ دبێژە.
عەونی ئۆزگوورەل داخویانیا خوەیا ھەری بەربچاڤ و بەرفرەھ ل سەر ڤێ مژارێ د سالا 2003ێ دە دا.
عەونی ئۆزگوورەل د 27ێ جۆتمەھا 2003ێ دە، لگەل «نەشە دووزەل» ھەڤپەیڤینەک کر. د ڤێ ھەڤپەیڤینێ دە، ئۆزگوورەل ئەشکەرە کر کو عەڤدللا ئۆجالان ل ئاژانسا فکر یا ترکیەیێ، کو رێخستنەکا پاراستی یا رێخستنا ئیستیخباراتا نەتەوەیی یا ترکیەیێ (میتێ)یە دیتییە و ئۆجالان د ڤێ ئاژانسێ دە کار کرییە.
ھەڤپەیڤینا ئۆزگوورەل وھایە:
عەونی ئۆزگوورەل: د ناڤبەرا سالێن 1966 و 1969ێ دە، ئەز دچووم «ئاژانسا فکر» یا ترکیەیێ دا کو کۆڤاران وەربگرم و بەلاڤ بکم. ئەڤ ئاژانسا فکری یا ترکیەیێ دەزگەهەکی سەر ب متێ ڤە بوو. دەما ئەز دچووم ڤێ دەرێ من گەنجەکی ئەسمەر ددیت، لێ ئەم ب هەڤ رە نەدئاخڤین، پشتی چەند سالان دەما من وێنەیێ عەڤدللا ئۆجالان دیت، من گۆت کو ئەڤ کەسێ من د ڤێ ئاژانسێ دە دیتی عەڤدللا ئۆجالانە، لێ من ئەڤ فکرا خوە ب کەسێن دەردۆرا خوە نەگۆت.
د سالا 1993یێ دە ئۆجالان کۆمەکا رۆژنامەڤانان بانگ کرن جەم خوە، ئەز ژی وەک رێڤەبەرێ کۆڤارا پانۆراما چووبووم، پشتی داخویانییا ئۆجالان خلاس بووی، ژ بەر کو ئەم کۆڤارەکا هەفتانە بووین، من خوەست لگەل ئۆجالان هەڤپەیڤینەکا تایبەت چێکم، ئۆجالان داخوازا من قەبوول کر، دەما هەڤپەیڤینێ من ژێ رە گۆت، “ل باژارێ ئانکارا لسەر کۆلانا ئیزمیرێ جیەک هەبوو کو ناڤێ وێ «ئاژانسا فکری» بوو، دبە ئەز شاش بفکرم، لێ کەت سەرێ من کو من تو ل ور دیتیە. ئۆجالان ژ من رە گۆت، نا، راست تێ بیرا تە، لێ بەلێ نها نە وەختێ وێ یە، ئەز دێ د دەمەکی گۆنجاو دە ڤان تشتا ئەشکەرە بکم.
نەشە دووزەل: باشە کەسێ کو دهاتن ڤێ ئاژانسێ ئیلا ئەندامێن میتێ بوون؟
عەونی ئۆزگوورەل: هەکە هیچ نەبا ژی ئیلاهی پێوەندییا وان ب ئیستیخباراتا میتێ ڤە هەبوو و کەسەکێ باوەرپیکری بوو، د ترکیەیێ دە هەگەر کەسەک بچە د ناڤا دەزگەهەکی کو هێزێن ئەولەکاریێ دروست کرییە و هەگەر هاتن و چوونێ بکە و کەس دەنگێ خوە ژێ رە نەکە، ئەڤ یان کەسەکی ئەرکدارە یان ژی کەسەکە کو باوەرییەکا خورت ژ بۆی وی هەیە، ژ خەینی ڤێ تشتەکی دن تونەیە.
نەشە دووزەل: بەرییا نها هاتبوو گۆتن کو هەڤژینا ئۆجالان کەسیرە یلدرم ژی بابێ وێ بەرپرسەکی میتێ بوو. هوون ژی دبێژن من ئۆجالان د ناڤا دەزگەهەکی سەر ب میتێ ڤە دیتیە، ئۆجالان ژی گۆتبوو کو کەسەکی ب ناڤێ پیلۆت د ئاڤاکرنا پەکەکێ دە رۆلەکی سەرەکی لیستییە و ئەو ژی سەر ب میتێ یە. باشە هوون چ دفکرن کو د دەستپێکا ئاڤاکرنا پەکەکێ دە ئەوقاس پێوەندیێن میتێ هەنە؟
عەونی ئۆزگوورەل: عەڤدللا ئۆجالان کەسەکە کو د باوەرییا ئایدۆلۆژیک دە لاوازە، ئەو کەسەکی پراگماتیکە کو دکارە لگەل هەر کەسێ هەڤکاریێ بکە. هەگەر د بزاڤەکا کوردان دە کەسەکی ب ڤی ئاوا سەرۆک بە، ئەڤ ژ ئالیێ دەولەتا ترکیەیێ ڤە دهات قەبوولکرن.
نەشە دووزەل: هەگەر دەولەت ژ دامەزراندنا پەکەکێ د دەستپێکێ دە ئەوقاس ئاگاهدار بوو چما 40 هەزار مرۆڤێن مە مرن و دەولەت نەکاری ڤێ یەکێ کۆنترۆل بکە؟
عەونی ئۆزگوورەل: ل گۆر رایا من دەولەتێ نەخوەست کۆنترۆل بکە، ژ بەر کو باشوورێ رۆژهلات (باکورێ کوردستانێ) وەکە کەرتەکێ چێببوو، هەبوونا بزاڤەکا وەکە پەکەکێ دهشت کو دەولەت ژ بودجەیا خوە یا ڤەشارتی پارە بکشینە و بکار بینە، و ژ بەر هەبوونا پەکەکێ ژی هەموو رەنگێن زەختێ ل سەر جڤاکێ چێدکرن، هندەکد ئەندامێن «ژیتەمێ» هەبوون کو نە پۆلیس بوون و نەژی عەسکەر بوون. هندەک ژ وانا کەسێن وەکە یەشیل (مەحموود یلدرم)، ئەڤ کەس ژ بەر خوە دە شین بووبوون و بهێز بووبوون، و هندەک گرووپ د ناڤا تیما ژیتەمێ دە هەبوون دەما ترومبێلەکە نۆرمال دچوو پێشییا وانا رادوەستان و شۆفێرێ ترومبێلێ دکوشتن، هەمان دەمێ ل باشوورێ رۆژهلات (باکورێ کوردستانێ) بییاڤێ ماددەیێن هشبەر پارەیەکێ زێدە زێدە ژێ دهات، د ئەنجام دە پلانا دەولەتێ و ئەڤ دەردۆرێن کو ب پارەیێن قرێژ ل سەر لنگان دمان، د ناڤا وان دە میزانەک هەبوو، ژ ڤێ رەوشا ل باشوورێ رۆژهلات چێبووی گەلەک گرووپ سوودمەند بوون. ئەڤ چەکێ کو ژ دەستێ پەکەکێ وەردگرتن جارەکا دن دفرۆشتن پەکەکێ، هەتا ڤان دەمێن داویێ پەکەکێ فیشەکێن د کارگەهێن دەولەتا ترکیەیێ دە هاتین چێکرن بکار دئانین، دەما تە پەکەکە ژناڤ بربا ئەڤ جوویە رادوەستییا و ئەڤ میزانا چێبووی هلدوەشییا.
ئەرکێ ئۆجالان چبوو؟
22 سال ب سەر داخویانییا عەونی ئۆزگوورەل ڤە دەرباس بوون، ئاخافتنێن وی گەلەکی گرینگن کو دیرۆکا رەش یا ئۆجالان باش بهێت ناسکرن، چما د شەرێ 41 سالان یێ پەکەکێ دە کوردان چ تشتەک ب دەست نەخستن، و چما عەڤدللا ئۆجالان پشتی ڤان سالان مافەکی کلتوری ژی ژ بۆی کوردان ژ دەولەتێ داخواز نەکر، دەما ئەم ڤان دیمەنان هەموویان تینن گەل هەڤدوو، تشتێ دکەڤە پێشبەری مە ئەڤە، عەڤدللا ئۆجالان نە تەنێ پشتی 1999ێ تەسلیمی دەولەتێ بوویە، ئەو د دەستپێکێ دە پرۆژەیەکێ دەولەتا ترکیەیێ بوو و ژبۆی سینۆردارکرنا جڤاکا کوردی هات بکارئانین، ژ ڤان دیمەنێن د ڤان دو سێ مەهێن داویێ دە دەردکەڤن دیار دبیت کو دەولەت ب پرۆژەیا خوە یا 50 سالان دخوازە دەستکەفتیەکێ مەزن ب دەست بخینە.
