وەزارەتا دەرڤە یا ئامەریکایێ راگهاند، وەزیر ماركۆ روبیۆ د پەیوەندیەکە تەلەفۆنی دە ل گەل سەرۆکوەزیرێ ئیراقێ محەمەد شه‌یاع سوودانی، ل سەر پرسا مووچەیێن فەرمانبەرێن هەرێما کوردستانێ، هناردەکرنا پەترۆلا هەرێمێ و مەترسیا کۆمێن چەکدارێن ل ئیراقێ گۆتووبێژ کریە.
وەزارەتا دەرڤە یا ئامەریکایێ ئیرۆ 23ێ تیرمەهێ د داخویانیەکێ دە ئەشکەرە کر، د پەیوەندیا تەلەفۆنی یا د ناڤبەرا روبیۆ و سوودانی دە، سێ مژارێن سەرەکی هاتنە نرخاندن. مژارێن گۆتووبێژێ؛ دایینا مووچەیێن فەرمانبەرێن هەرێما کوردستانێ، دوبارە دەستپێکرنا هناردەکرنا پەترۆلا هەرێمێ و کێمکرنا باندۆرا ئیرانێ یا ل سەر ئیراقێ بوون.
د پەیوەندیێ دە، وەزیرێ دەرڤەیێ ئامەریکایێ تەکەزی ل سەر گرینگیا لێپرسینێ ژ وان کەسان کر کو دەستێ وان د ئێریشێن داوی یێن ل سەر بنەسازیا ئەنەرژیێ یا ئیراقێ دە هەیە. روبیۆ هەروه‌ها بال کشاند سەر پێویستیا گرتنا تەدبیران دا کو ئەڤ ئێریش د پێشەرۆژێ دە دوبارە نەبن.
پەیاما ژ بۆ هەرێما کوردستانێ
ماركۆ روبیۆ ئاماژە ب گرینگیا بەردەوامکرنا دایینا مووچەیێن فەرمانبەرێن هەرێما کوردستانێ و دەستپێکرنا هناردەکرنا پەترۆلێ ب رێیا بۆریا ئیراق-ترکیەیێ کر.
ئەڤ پەیوەندیا تەلەفۆنی د دەمەکێ دە پێک هات، وەزارەتا دارایی یا هەرێما کوردستانێ دوهـ 22ێ تیرمەهێ راگهاندبوو، ژ داهاتا نەپەترۆلی یا هەرێمێ، 120 ملیار دینار ژ بۆ مووچەیا مەها گولانێ وەکە پەرەیێ کاش خستیە سەر حسابێ بانکی یێ وەزارەتا دارایی یا حکوومەتا فەدەرال.
نیگەرانی ل سەر یاسایا حه‌شدا شەعبی
روبیۆ نیگەرانیێن جدی یێن ئامەریکایێ دەربارێ پرۆژەیاسایا حەشدا شەعبی دە، کو نها ل پارلامەنتۆیا ئیراقێ راوەستاییە، دوبارە کر. وی دا زانین کو هەر یاسایەکە ب ڤی رەنگی دێ ببە سەدەما خورتکرنا باندۆرا ئیرانێ و کۆمێن چەکدار، کو ئەڤ یەک سەروەریا ئیراقێ تێک ددە.
