پێڤاژۆیا ئاشتیێ یان پێڤاژۆیا تەسلیمبوونێ؟
د تیرمەها سالا 2025 دە، عەڤدللا ئۆجالان ب ڤیدەئۆیەکێ کو د بن چاڤدێرییا میتێ دە هاتبوو تۆمارکرن پەیامەک وەشاند. دەما گەلێ کورد ل ڤیدیۆیێ نێری مەندەهۆش مان. سەدەما سەرەکەیا مەندەهۆشییا گەلێ کورد ژ بەر ڤێ یەکێ بوو کە ئۆجالان تەکەزی ل سەر ئاخافتنا خوە یا د 27ی سباتێ دە کر و گۆت، بلا پەکەکە خوە هلوەشینە و دەست ژ چەکان بەردە و دەست ب ستراتەژییا جڤاکا دەمۆکراتیک بکە.
دەما مرۆڤ سادە ل رستەیا “گوهەرینا تەکۆشینا چەکداری ژ بۆی سیاسەتا ئاشتیخوازیێ” دنێرە، دبە کو وەکە بژاردەیەکە ستراتەژی یا پێشکەتی وەرە بەرچاڤ. لێ بەلێ، دەما کەسەک “گوهەرینا تەکۆشینا چەکداری ژ بۆی سیاسەتا ئاشتیخوازیێ” وەکە سەرکەفتنەکە ئەخلاقی و فەلسەفی بەچاڤ بکە و بێی کو دانپیدانێ ب شکەستنێ بکە، وێ دەمێ ئەڤ پرۆژە مەشرووعیەتا خوە ژ دەست ددە.
غاندی ت جاری تەسلیم نەبوو هەتا کو پشترە وێ تەسلیمبوونێ وەکە سەرکەفتن بەرچاڤ بکە، بەلکو ب وێرەکی رووبروویێ شکەستنێ بوو و شاشتیێن خوە بەرچاڤکرن، وی ب ت یۆتۆبیایەکێ شکەستنا خوە نە نوخماند. لێ بەلێ عەڤدللا ئۆجالان دەست ژ ئارمانجا دەولەتبوونا کوردستانا مەزن هلگرت بێی کو بەدیلەکی دن یێ لۆژیکی ژ خەلکێ رە ئەشکەرە بکە، بەرەڤاژی ڤێ یەکێ خەلک خستە ناڤا ئاخافتنەکا سەمبۆلیک و هەستەکە وجودی دە.
عەڤدللا ئۆجالان بانگا پڕکرنا ڤالاهییا سیاسی ب سیاسەتا ئاشتی و جڤاکا دەمۆکراتیک دکە، ئەو دبێژە، بلا لیژنەیەک د ناڤا پارلەمەنتۆیا ترکیێ دە وەرە ئاڤاکرن ژ بۆی کو چاڤدێرییا قۆناغا داهاتی بکە، لێ بەلێ کا دەستوور؟ گەلۆ گارانتی چنە؟ نوونەراتییا گەلێ کورد د پرۆژێ دەولەتا ترک دە ل کو دەرێ یە؟
پێویستە ببێژین دەما چ رێکەفتنەکا راستەقینە یا ئیمزاکری د ناڤا پرۆژەیێ ئاشتیێ دە نەبت، ئەو پرۆژە دبە خەونەک د ناڤا ڤالاهییا ئاسمانی دە و نابە بژاردەیەک دیرۆکی.
عەڤدللا ئۆجالان ئێدی وەکە سەرکردەیەک شۆرەشگەر کو بکارە گەل ئاراستەیی ئازادی و سەرخوەبوونێ بکە نەمایە، بەلکو ئەز دکارم ببێژم ئەو وەکە رەوشەنبیرەکی لێهاتییە کو جیهانێ د ناڤا مەژیکێ خوە دە وێنە دکە و داخوازێ ژ ب ملیۆنان کوردان دکە کو پیدڤییە دەستان بۆ وی وێنەیێ د سەرێ وی دا لیدەن.
داخویانیێن ئۆجالان دکەڤن خانەیا دەربرینا تاکەکەسی، نە وەک رێنیشاندەرێ نەتەوی یێ گەلێ کورد یێ بندەست. فەلسەفەیا ئۆجالان ژ بۆی قوماشەکی ئاوریشمی هاتە گوهەرین، ئەو ژ درۆشما کوردستانا مەزن هاتە سەر درۆشما جڤاکا دەمۆکراتیک بێی کو خوە رەخنە بکە یانژی شکەستنا خوە راگهینە. تشتا هەری خەتەرناک د داخویانییا وی دە نە ئەڤە کو کورد داخوازا دەولەتا سەربخوە نەکن، بەلکو تشتێ خەتەرناک ئەڤە کو قوربانیێن سەدان سالان یێن گەلێ کورد ژ بۆی سەرخوەبوون و ئازادییا خوە دایین ب کارەکی نەباش و نە ساخلەم بەرچاڤ دکە و شرۆڤە دکە و هەول ددە کو کوردان ژ هزرا نەتەوی پاشگەز بکە، ئەو دەربارا سەرخوەبوونا کوردان دبێژە، “هەر داویەکێ دەستپێکەک هەیە.”
دڤێ دیار بکم کو عەڤدللا ئۆجالان نە ب تەنێ کەتیە بن کۆنترۆلا دەولەتا ترکیەیێ دە، بەلکو بەردەوام هەول ددە پرۆژەیا خوە یا کو د بن چاڤدێرییا دەولەتا ترک دە هاتیە ئامادەکرن، ب رێیا گۆتنێن فەیلەسۆف و هزرمەندێن جیهانی بنەخشینیت و ب کوردان بدت قەبوولکرن، ئۆجالان خوە وەکە خوەدیێ گۆتنا “هەر داویەکێ دەستپێکەک هەیە” ددە دیارکرن، لێ بەلێ ئەڤ گۆتن نە ژ دارشتنا هزرا وی ب خوە یە، بەلکو پێش وی ب هەزاران سالان فیلسۆف و هزرمەندان ئەڤ گۆتن بەرچاڤکریە، شاعرێ ئینگلیز ت.س. الیوت دبێژە، “یا کو تو ل دەستپێکێ دزانی، گەلەک جاران داوییە، داوی دبە دەستپێک”. هەر وەها نیچە دبێژە “زڤرینا بێ داوی”، دیسان فەلسەفەیا بۆزی و هندۆسان ب درێژی ل سەر ڤێ چەندێ شۆرەڤەکرن هەنە. ب تەنێ ئۆجالان هاتیە ئەڤ هزرە گوهرییە و ب ناڤێ خوە پارڤە کریە و دۆزا گەلێ کورد کرییە قوربانی ڤێ گۆتنا فەلسەفی.
دڤێ ئەڤ پرسە ژ ئۆجالان وەرە کرن: گەلۆ بیرمەندان شیان هەنە راستگۆ بن، ئەگەر جەوهەرێ پرۆژەی ڤەشێریت، ئەو پرۆژەیێ ب خوینا هەزاران جانگۆری و شۆرەشگەران هاتیە نڤیساندن و وی پرۆژەی ب گۆتنا “هەر داویەکێ دەستپێکەک هەیە” ژ ناڤ ببت؟
