پارتیا وەکھەڤی و دەمۆکراسیا گەلان (دەم پارتی) ناڤێن چار پارلامەنتەرێن خوە یێن کو دێ د کۆمیسیۆنا پارلامەنتۆیا ترکیەیێ یا ژ بۆ پێڤاژۆیا ئاشتیێ دە جھ بگرن، ب ئاوایەکی فەرمی ئەشکەرە کرن.
ل گۆری داخویانیا دەم پارتیێ، ناڤێن کو ژ بۆ کۆمیسیۆنێ ھاتنە دیارکرن کەسایەتێن خوەدی ئەزموونن و ژ ڤان پارلامەنتەران پێک تێن:
گولستان کلچ کۆچیگید: جیگرا سەرۆکێ فراکسیۆنا دەم پارتیێ
مەرال دانش بەشتاش: ھەڤبەردەڤکا کۆنگرەیا دەمۆکراتیکا گەلان (HDK) و پارلامەنتەرا ئەرزرۆمێ
ساروھان ئۆلوچ: پارلامەنتەرێ ئانتالیایێ
جەنگیز چیچەک: پارلامەنتەرێ ستەنبۆلێ
ئەڤ بریارا دەم پارتیێ پشتی داخویانیێن سەرۆکێ پارلامەنتۆیا ترکیەیێ نومان کورتولموش تێ، کو راگھاندبوو کۆمیسیۆن دێ د دەمەک نێز دە دەست ب کار بکە.
سەرۆکێ پارلەمەنتۆیا ترکیەیێ نومان کورتولموش، د داخویانیەکە خوەیا داوی دە کو رۆژا یەکشەمبێ (27/7/2025) ل چاناککالەیێ دابوو، راگھاند کو کۆمیسیۆن دێ د دەستپێکا مەھا بهێت دە دەست ب کار بکە.
کورتولموش تەکەز کر، “کۆمیسیۆنا پارلەمەنتۆیێ دێ ببە بنگەھا خورتکرنا دەمۆکراسیا ترکیەیێ؛ فکر و رامانێن جودا دێ بێن نیقاشکرن و بریار دێ ل گۆری بەرژەوەندیا خەلکی بێن دان.”
ھەروھا دەستنیشان کر کو “پێڤاژۆیا نوو یا ئاشتیێ پێدڤیتی ب گەلەک دەمێ نینە، لێ پێدڤیتی ب رێبازەکا ئەرێنی و ئیرادەیەکە جدی ھەیە” و داخواز ژ خەلکێ ترکیەیێ کر کو پشتگریێ بدن ڤێ قۆناغێ.
کۆمیسیۆن دێ ژ 51 ئەندامان پێک هێت و دڤێت ھەتا 31ێ تیرمەھێ بهێت ئاڤاکرن. ژ بلی دەم پارتیێ، مەھەپێ ژی بەرێ ناڤێن چار نوونەرێن خوە ئەشکەرە کربوون.
ژ ئالیێ دن ڤە، IYI پارتی کو خوەدی سێ نوونەرانە، راگھاندیە کو ئەوێ بەشداری کۆمیسیۆنێ نەبە و جەهەپێ ژی ھەتا نھا دەربارێ بەشداربوون یان نە بەشداربوونا خوە دە بریارەکا داوی نەدایە. چاڤەرێیە کو د رۆژێن پێش دە ھەلوەستا پارتیێن دن ژی زەلال ببە.
