جیگرا سەرۆکێ کۆما دەم پارتیێ گولستان کلچ کۆچییگیت دەربارێ ئاڤاکرنا کۆمیسیۆنا پارلامەنێ یا ژ بۆ پێڤاژۆیا ئاشتیێ دە راگهاند، “ئەم قەبوول ناکن کو ئەڤ پێڤاژۆ تەنێ ب تەرۆرێ ڤە وەرە گرێدان.” کۆچییگیت تەکەز کر کو دڤێ ناڤێ کۆمیسیۆنێ خزمەتا چارەسەریا دەمۆکراتیکا پرسا کورد بکە.
کۆچییگیت دوهـ 4ێ تەباخێ د داخویانیەکێ دا زانین، د جڤینا رۆژا سێشەمێ دە دێ ل سەر ناڤ و سیستەما خەباتێ یا کۆمیسیۆنێ گۆتووبێژ وەرن کرن و پرانیا مژاران دێ زەلال ببن.
“ئەم گرێدانا ب تەرۆرێ رە قەبوول ناکن”
گولستان کلچ کۆچییگیت، دەربارێ ناڤێ کۆمیسیۆنێ دە هەلوەستا پارتیا خوە دیار کر و گۆت: “مە ناڤەک پێشنیار کربوو کو کۆمیسیۆن ب ناڤێ ئاشتی و جڤاکا دەمۆکراتیک بە. ئەم راست نابینن کو ئەڤ پێڤاژۆ تەنێ ب تەرۆرێ ڤە وەرە گرێدان و ئەم ڤێ یەکێ قەبوول ناکن.”
کۆچییگیت تەکەز کر، دڤێ ناڤەرۆک و ناڤێ کۆمیسیۆنێ د خزمەتا چارەسەریێ دە بن و گۆت: “پێویستە ناڤێ کۆمیسیۆنێ ب ئاوایەکی بە کو خزمەتا چارەسەریا دەمۆکراتیکا پرسا کورد و ئاشتیا جڤاکی یا ل ترکیەیێ بکە. دڤێ تێگەها دەمۆکراسیێ د ناڤێ کۆمیسیۆنێ دە هەبە.”
هەروها دا زانین، پشتی جڤینا رۆژا سێشەمێ، دێ سەرۆکێ پارلامەنێ ئەنجامێن داوی ژ رایا گشتی رە ئەشکەرە بکە.
“ب چارەسەرکرنا پرسا کورد، ترکیە دەمۆکراتیکتر دبە”
جیگرا سەرۆکێ کۆما دەم پارتیێ ئارمانجا سەرەکە یا ڤێ پێڤاژۆیێ ژی دەستنیشان کر و گۆت: “ئەڤ پێڤاژۆ ژ بۆ دەمۆکراتیکبوونا ترکیەیێ و چارەسەرکرنا پرسا کوردە. لگەل چارەسەرکرنا پرسا کورد، دێ ترکیە دەمۆکراتیکتر ببە.”
