پشتی جڤینا دەستەیا بریار و رێڤەبەریا ناڤەندیا ئاک پارتیێ یا ب سەرۆکاتیا رەجەپ تاییپ ئەردۆگان، بەرڤەکێ ئاک پارتیێ عۆمەر چەلیک راگهاند، پرۆسەیا “کۆمیسیۆنا پارلامەنتۆیێ ژ بۆ پرۆسەیا چەکدانین و خوەهلوەشاندنا په‌كه‌كێ هاتیە دامەزراندن».
چەلیک دا زانین، رۆژەڤا سەرەکە یا جڤینێ پرۆسەیا کو وەکە “ترکیەیا بێتەرۆر” پێناسە کرنە بوو و سەرۆکۆمار ئەردۆگان تەکەزی ل سەر وێ یەکێ کریە کو دڤێ ئەڤ پرۆسە “ب ئاوایەکە هەستیار” برێڤە بچە.
“ئارمانجا کۆمیسیۆنێ دیارە”
عۆمەر چەلیک بال کشاند سەر کۆمیسیۆنا کو ل پارلامەنتۆیێ هاتیە دامەزراندن و ئارمانجا وێ یا سەرەکە وها راڤە کر: “کۆمیسیۆنا پارلامەنتۆیێ ژ بۆ پرۆسەیا چەکدانین، چەک شەوتاندن، رادەستکرن و خوەهلوەشاندنا په‌كه‌كێ هاتە دامەزراندن. پارلامەنتۆ و کۆمیسیۆن رۆژەڤا خوە باش دزانن”.
هەروها گۆت: «ئەم دبینن هن ئالی دخوازن کارێ کۆمیسیۆنێ فرەهتر بکن. هن پێشنیار هەتا مە ژی تێن. لێ ئارمانجا سەرەکە دیارە. نیقاشێن گوهەرینا دەستوورێ هەنە، ئەڤنە گرێدایی ڤێ مژارێ یە. داخوازا مە یا چێکرنا دەستوورەکە سڤیل هەیە، لێ ئەڤ نە مژارا ڤێ کۆمیسیۆنێ یە”.
چەلیک هەروها تەکەز کر، ئەو ڤێ پرۆسەیێ وەکە مژارەکە بازاریێ نابینن و گۆت: “ئەم دخوازن ب هەموو ئالیێن جڤاکێ رە هەڤدیتنان بکن. ئەم دخوازن گومانێن هن ئالیێن جڤاکێ راکن و مالباتێن کەسێن جانێ خوە ژ دەست دانە، دلنیا بکن”.
“پرۆسە هه‌سه‌دێ ژی ل خوە دگرە”
بەشا هەری بالکێشا داخویانیا چەلیک ئەو بوو کو ب ئاوایەکی ئەشکەرە ئاماژە ب وێ یەکێ کر کو بریارا چەکدانین و خوەهلوەشاندنێ هەموو رێخستنێن گرێدایی په‌كه‌كێ ل خوە دگرە و د ڤی واری دە راستەراست ناڤێ هه‌سه‌دێ ئانی زمان.
چەلیک وها ئاخڤی: “د دەستپێکا پرۆسەیێ دە مە گۆت، دڤێ هەموو بەش و رێخستنێن گرێدایی په‌كه‌كێ چەک بەردن و هەموو سازیێن نەیاسایی ژی خوە هلوەشینن. پرۆسەیا ترکیا بێتەرۆر بۆ مە ئەڤە. لێ ئەم دبینن، ل سووریەیێ ئەڤ یەک نەهاتیە قەبوولکرن. هه‌سه‌ده یا گرێدایی په‌كه‌كێ و حکوومەت رێکەفتبوون کو د هەیاما سالەک دە چەکێن خوە دەینن و تەڤلی ئارتێشا سووریەیێ ببن. ئەم دبینن هن هەلوەستێن دژی یەکپارچەییا ئاخا سووریەیێ و سەروەریا وێ هەنە. ئەو مۆدێلێن کو بۆ سووریە و ئیراقێ پێشنیار دکن،نە ژ بۆ کوردان،نە ژ بۆ عەرەبان و نه ژی ژ بۆ ترکمەنان ب فێدەنە”.
