تەرمێن هەژمارەکە دن یا کوردێن ئێزدی یێن کو د جینۆسایدا سالا 2014ان دە ژ ئالیێ داعشێ ڤە هاتبوون کوشتن، ژ بزیشکیا دادی یا بەغدایێ هاتن ڤەگەراندن و دێ د مەراسیمەکێ دە رادەستی مالباتێن وان وەرن کرن.
د چارچۆڤەیا قۆناغا هەشتەمین یا ڤەگەراندنا تەرمان دە، تەرمێن 22 کوردێن ئێزدی پشتی کو ئەنجامێن پشکنینا DNAیێ دەرکەتن، ژ بەغدایێ ژ بۆ بزیشکیا دادی یا مووسلێ هاتنە شاندن.
ل گۆری زانیاریان، بریارە سبە 13ێ تەباخێ، دەمژمێر 10:00ێ سبەهێ، تەرم د مەراسیمەکە تایبەت دە ل گوندێ “سۆلاخ”ێ سەر ب شنگالێ ڤە رادەستی مالباتێن وان بێن کرن و پشترە ل وارێ وان ب خاکێ بێن سپارتن.
ژ ڤان تەرمێن کو هاتنە ڤەگەراندن، 17یێن مێران، 4 یێن ژنان و یەک ژی یا زارۆکەکی 9 سالی یە. هات دیارکرن کو قوربانی خەلکێ گوندێن کۆچۆ، ته‌ل عوزەیر، قونێنە، سۆلاخ، هەمەدان و حەردانن.
ل گۆری ئامارێن رێخستنا ‘Petrichor’ یا مافێن مرۆڤان، هەتا نها ل شنگالێ 93 گۆرێن ب کۆمی و 13 گۆرێن تاکەکەسی هاتنە دیتن. ژ ڤان گۆران، تەرمێن 798 وەلاتیێن ئێزدی ژ بۆ ناسینا ناسنامەیێن وان شاندنە بەغدایێ. ب گهشتنا ڤێ قۆناغا هەشتەمین، هەتا نها ب گشتی 296 تەرم رادەستی مالباتێن خوە هاتنە کرن.
هەمان رێخستن دەستنیشان دکە، پرۆسەیا ڤەکۆلاندنا گۆرێن ب کۆمی و ڤەگەراندنا تەرمان کو زێدەتری چار سالن بەردەوامە، “گەلەک ب سستی” ب رێ ڤە دچە و حکوومەتا ئیراقێ ت بوودجەیەک تایبەت ژێ رە تەرخان نەکریە.
د سالا 2014ان دە، رێخستنا تەرۆریستا داعشێ ئێریشی شنگالێ کر. د وێ دەمێ دە، ژ بلی کۆمکوژیا هەژمارەکە مەزن یا کوردێن ئێزدی، ب هەزاران ژن و زارۆک هاتن رەڤاندن و وەکە کۆلە هاتن فرۆتن. ئەو کەسێن کو هاتن کوشتن، د گۆرێن ب کۆمی دە هاتن ڤەشارتن.
