کۆمیسیۆنا هەڤگرتنا نەتەوەیی، براتی و دەمۆکراسیێ یا پارلامەنتۆیا ترکیەیێ ئیرۆ ب بەشداریا هەموو ئەندامێن خوە جارا سێیەمین دجڤە.
پشتی داخوازا سەرۆکێ مەجلسێ نومان کورتولموش د 11ێ تەباخێ دە، ئاک پارتی، جه‌هه‌په و دەم پارتیێ ئەندامێن خوە یێن نوو ژ بۆ کۆمیسیۆنێ دیار کرن. ل گۆری ئاگاهیان، ئاک پارتیێ پارلامەنتەرێ دەنیزلیێ جاهت ئۆزکان، جه‌هه‌پێ پارلامەنتەرێ ئەنقەرەیێ ئوموت ئاکدۆگان، و دەم پارتیێ ژی جەلال فرات وەکە ئەندامێن نوو ئەرکدار کرن. ب ڤێ یەکێ، هەژمارا ئەندامێن کۆمیسیۆنێ گهشت 51 کەسان.
بریارە کۆمیسیۆن ب ئەندامێن خوەیێن نوو رە ئیرۆ دەمژمێر 14:00ان ل ئەیوانا مەراسیمێ یا پارلامەنتۆیێ بجڤە و دەربارێ خەباتێن پێش دە نرخاندنان بکە.
پێڤاژۆیا ئاشتیێ ب بانگا سەرۆکێ گشتییێ مه‌هه‌پێ دەڤلەت باخچەلی دەست پێ کربوو. د ڤێ چارچۆڤەیێ دە، د 11ێ تیرمەها 2025ان دە، کۆمەکە 30 کەسی یا ئەندامێن په‌كه‌كێ، کو 15 ژ وان ژن بوون، ل دەڤەرا شکەفتا جاسەنەیێ یا ل سینۆرێ سلێمانیێ د مەراسیمەکێ دە چەکێن خوە شەوتاندبوون.
پشتی ڤێ مەراسیمێ، بریار هاتبوو دایین کو کۆمیسیۆنا هەڤگرتنا نەتەوەیی، براتی و دەمۆکراسیێ ل مەجلسێ وەرە ئاڤاکرن. کۆمیسیۆنێ جڤینا خوە یا یەکەم د 5ێ تەباخێ دە ل دار خستبوو و د وێ جڤینێ دە ناڤێ کۆمیسیۆنێ هاتبوو دەستنیشانکرن و رێزکنامەیا خەباتێ یا ژ 12 خالان پێک دهات، ب یەکدەنگی هاتبوو قەبوولکرن.
د جڤینا دویەمین دە کو د 8ێ تەباخێ دە پێک هاتبوو، وەزیرێ ناڤخوە عه‌لی یەرلیکایا، وەزیرێ بەرەڤانیێ یاشار گولەر و سەرۆکێ میتێ ئیبراهیم کالن، دەربارێ پێڤاژۆیا چەکدانینا په‌كه‌كێ دە زانیاری پێشکێشی کۆمیسیۆنێ کربوون.
