سەرۆکێ سووریەیێ ئەحمەد شەرع، د گۆتارەکێ دە تەکەزی ل سەر یەکپارچەبوونا ئاخا سووریەیێ کر و ھەر جورە سەناریۆیێن دابەشکرنا وەلات ب توندی رەد کر. شەرع دیار کر، “سەدەمێن دابەشبوونێ ل سووریەیێ نینن.”
د جڤینەکا لگەل ھەژمارەک وەزیر، ئەکادەمیسیەن، سیاسەتمەدار و کەسایەتیێن ناڤدارێن پارێزگەھا ئدلبێ دە، ئەحمەد شەرع رەخنەیێن توند ل وان ئالیان گرتن کو بیر ل دابەشکرنا سووریەیێ دکن و گۆت: “ھەر کەسێ کو ل سووریەیێ داخوازا دابەشبوونێ بکە، ژ ئالیێ سیاسی ڤە نەزان و خەیالپەرەستە.” ھەروھا دا زانین، “گەلەک جاران بیر و باوەریێن خەیالی، ئالیگرێن خوە بەر ب خوەکوشتنێ ڤە دبن.”
سەرۆکێ سووریەیێ پشتراستیا خوە نیشان دا و گۆت: “ئەز ل سووریەیێ مەترسیا دابەشبوونێ نابینم.” شەرع ئاماژە ب وێ ژی کر، ھندەک ئالی ھەنە کو دخوازن وەلاتی پارچە بکن و کانتۆنێن ناڤخوەیی ئاڤا بکن، لێ ل گۆری وی “ئەڤ یەک ژ ئالیێ مەنتقی، سیاسی، نەتەوەیی و چاندی ڤە نە پێکانە.”
د بەشەکا دن یا ئاخافتنا خوە دە، شەرع ھشیاری دا ل سەر “پێشبازیا نەرینی، پۆستێن سیاسی و لێگەرینا ل رۆلان” و تەکەز کر کو ئەڤ دیاردە، ب تایبەتی د قۆناغا ھەستیار یا ئاڤاکرنا دەولەتێ دە، باندۆرەکا نەرینی ل سەر پێکھاتەیا جڤاکێ دکن.
دەربارێ پشتەڤانیا ھندەک ئالیێن ناڤخوەیی ب ھێزێن ھەرێمی یێن وەکی ئیسرایلێ رە، شەرع دەستنیشان کر، ئەڤە کارەکی “گەلەکی دژوارە” و نێرینا خوە وھا دیار کر: “ھەرێما باشوور خوەدی نفووسەکا گەلەک مەزنە و ھەر دژمنەک بخوازە بکەڤە ھوندر، دڤێت پۆلیسەکێ ل بەر دەریێ ھەر مالەکێ دەینە، کو ئەڤ یەک د راستیێ دە نە پێکانە.”
تێکلداری بوویەرێن داوی یێن ل پارێزگەھا سوەیدایێ، ئەحمەد شەرع تەکەز کر کو دەولەت پابەندە کو لێپرسینێ لگەل ھەموو کەسێن کو ل وێ پارێزگەھێ بنپێکاری کرنە بکە.
