عەلی باباجان سەرۆکێ پارتیا دەڤا، ل مێردینێ بەشداری بەرنامەیا “ھەڤدیتنا ل گەل سازیێن جڤاکا سڤیل، کارساز و رووسپیێن جڤاکێ” بوو کو ژ پارتیا وی رێخستنا شاخا مەردینێ ڤە ھاتبوو ل دارخستن.
باباجان د دەربارێ “پێڤاژۆیا ترکیایا بێ تەرۆر” دە ئاخڤی و گۆت: “ئەم ڤێ پێڤاژۆیێ گەلەکی گرینگ دبینن. ئەم فێم دکن کو ئامادەھیا ل پشت ڤێ پێڤاژۆیێ، ئامادەھیەکا پلانکری و ب ھوورگلی ھاتیە کرن.
ژ بەر کو مە ئەڤ یەک فێم کر و دیت، مە ژ رۆژا یەکەم ڤە گۆت کو ئەم دێ ڤێ پێڤاژۆیێ ب گەشبینیەکا ب تەدبیر بشۆپینن. ئەم دێ شاشیێن کو د پێڤاژۆیێ دە ببینن بینن زمان. ئەم دێ پێشنیارێن خوە ژی بێژن. ھەکە ئیحتیمالا سەرکەتنا ڤێ پێڤاژۆیێ ژ سەدی 5 بە ژی ئەم دێ پشتگریێ بدن وێ ئەگەرا ژ سەدی 5.”
باباجان داخویاند کو ل ترکیەیێ بداویکرنا توندیێ مژارەکا پر گرینگ و دیرۆکی یە و گۆت:
“ئەم پارتیەکا ئۆپۆزسیۆنێ نە، لێ مە ژ رۆژا دەستپێکێ ڤە هەست ب ڤێ بەرپرسیاریا دیرۆکی ل سەر ملێن خوە کر.
مە ژ رۆژا دەستپێکێ ڤە دەست ب ھەڤکاریێن خوەیێن ژ بۆ پێڤاژۆیێ کر.”
باباجان بال کشاند سەر خەباتێن کۆمیسیۆنا ھەڤگرتنا نەتەوی، براتی و دەمۆکراسیێ و گۆت: “دڤێت نە تەنێ پارلامەنتەر، ھەر وھا پسپۆر، ئاکادەمیسیەن و نوونەرێن سازیێن جڤاکا سڤیل ژی تەڤلی کۆمیسیۆنا ھەڤگرتنا نەتەوی، براتی و دەمۆکراسیێ ببن. میکانیزمەکا سیاسی یا کو ژ بۆ نەرینێن دەرڤە ڤەکری بت، دکارە ئەنجامێن باشتر ب دەست بخە.”
باباجان ل سەر داخوازا کو کۆمیسیۆن گوھێ خوە بدە نەرینێن عەبدوللاھ ئۆجالان ژی گۆت:
“گرینگە کۆمیسیۆن نەرینێن ئۆجالان ب ئاوایەکی ل بەر چاڤان بگرە و بنرخینە. کۆمیسیۆن دێ رێبازا ڤێ یەکێ دیار بکە و بنرخینە.”
