هەڤسەرۆکا دەستەیا تێکلیێن دەرڤە یا رێڤەبەریا خوەسەر ئیلهام ئەحمەد، د ئاخافتنەکە خوە دە ل باژارێ مارسیلیا یێ فرانسایێ، جارەکە دن پابەندبوونا رێڤەبەریا خوەسەر ب یەکپارچەییا ئاخا سووریەیێ رە ئانی زمان و راگهاند، ئەو ل دژی هەموو پرۆژەیێن کو سووریەیێ پەرچە دکن دەردکەڤن.
د جڤینەکە گرسەیی دە کو ب سەدان کوردێن ل فرانسایێ بەشدار بوون، ئیلهام ئەحمەد بال کشاند سەر گەشەدانێن سیاسی یێن داوی ل سووریەیێ و رۆلا کوردان د پێشەرۆژا وەلات دە. ئەحمەد تەکەزی ل سەر دەستکەفتیێن شۆرەشا رۆژئاڤا و گرینگیا پێکانینا یەکیتیا نەتەوەیی یا کوردان کر و گۆت: “پێویستە ناکۆکیێن ناڤخوەیی یێن د ناڤبەرا ئالیێن کوردی دە ب دیالۆگ و تێگهشتنێ بێن چارەسەرکرن.”
ئیلهام ئەحمەد دا زانین، ئەو پابەندی لهەڤکرنا 10ێ ئادارێ یا د ناڤبەرا فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عەبدی و سەرۆکێ قۆناغا ڤەگوهێزا سووریەیێ ئەحمەد شەرع دەنە. هەروها دەستنیشان کر، پاشەرۆژا سووریەیێ ب ئاڤاکرنا چارچۆڤەیەکە دەستووری ڤە گرێدایی یە کو مافێن هەموو گەل و پێکهاتەیێن وەلات ل سەر بنگەها وەکهەڤی و دادپەروەریێ مسۆگەر بکە.
هەڤسەرۆکا دەستەیا تێکلیێن دەرڤە باوەریا خوە ب چارەسەریێن ئاشتیانە ئانی زمان و وها پێ دە چوو: “ب هەڤکاریا هەموو پێکهاتەیان، گەلێن سووریەیێ دکارن د ناڤ ئاشتیێ دە ب هەڤ رە بژین.”
ئەڤ داخویانی د دەمەکێ دە تێن کو رەوشا سووریەیێ د قۆناغەکە هەستیار رە دەرباس دبە و گۆتووبێژێن سیاسی ژ بۆ دیارکرنا پاشەرۆژا وەلات بەردەوام دکن. د رۆژێن بۆری دە ئەحمەد شەرع ژی راگهاندبوو کو ئالیێن ناڤنەتەوەیی ژ بۆ چارەسەریەکە ئاشتیانە ل باکور و رۆژهلاتێ سووریەیێ رژدن و دانووستاندنێن وان ب هه‌سه‌دێ رە هەنە. شەرع ژی وەکی ئیلهام ئەحمەد تەکەز کربوو کو ئەو هەر جورە دابەشکرنا سووریەیێ رەد دکن.
تەڤی ڤان هەڤدیتن و داخویانیان، هەتا نها د ناڤبەرا رێڤەبەریا خوەسەر و شامێ دە ل سەر پرەنسیبێن بنگەهینێن گرێدایی مافێن کوردان و ئاوایێ رێڤەبرنا سووریەیا نوو لهەڤکرنەکە فەرمی چێنەبوویە.
