ھێزێن لەشکەری یێن ئامەریکایێ، ڤێ سبێ زوو ب ئاوایەکی چاڤەرێنەکری، ژ دو بارەگەھێن خوەیێن لەشکەری یێن سەرەکی ل عەین ئەل-ئەسەد و ڤیکتۆریایێ دەست ب ڤەکشینێ کرن.
ل گۆر ئاگاهیان، ئیرۆ 24ێ تەباخێ ل سەر زمانێ ژێدەرەکی پایەبلندێ حکوومەتا ئیراقێ راگھاند، فەرمان ژ بالیۆزخانەیا ئامەریکایێ دەرکەتیە کو ھێزێن وان ژ ڤان ھەر دو بارەگەھان بێن ڤەکشاندن و ئەڤ پێڤاژۆ دێ ب ئاوایەکی قۆناغ ب قۆناغ بە.
ھەمان ژێدەری دیار کر، پرۆسەیا ڤەکشینێ ئیرۆ دەست پێ کریە و بەشەک ژ لەشکەران ژ ھەر دو بارەگەھان دەرکەتنە. تێ پایین کو د ناڤا چەند رۆژێن بهێت دە ئەڤ ھەر دو بارەگەھ ب تەمامی بێن ڤالاکرن.
ل گۆری ئاگاھیان، ل بارەگەھا عەین ئەسەد نێزیکی دو ھەزار لەشکەرێن ئامەریکی ھەبوون، ھەروھا ل بارەگەھا ڤیکتۆریایێ یا کو دکەڤە ناڤ فرۆکەخانەیا ناڤنەتەوەیی یا بەغدایێ ژی ھەژمارەکا دن یا لەشکەران ھەبوون.
بەشەک ژ وان لەشکەرێن کو ژ ڤان بارەگەھان ھاتنە ڤەکشاندن، ژ بۆ ھەولێرێ ھاتنە ڤەگوھاستن.
ئەڤ پێنگاڤ د چارچۆڤەیا داخویانیەکا بەرێ دە تێ، کو شێورمەندێ سەرۆکوەزیرێ ئیراقێ حوسێن عەلاوی رۆژا 17ێ تەباخێ تەکەز کربوو: “حکوومەتا ئیراقێ پابەندی پرۆگراما خوە یا حکوومەتێیە کو ھێزێن چەکدار ئاڤا بکە، ئەرکێن ھەڤپەیمانیا ناڤدەولەتی بداوی بینە و پێوەندیێن ئەولەھیێ لگەل وان ڤەگوھەرینە پێوەندیەکا بەرەڤانیێ یا دوئالی، کو د بن سیوانا پێوەندیێن سیاسی، ئابۆری و چاندی دە برێڤە بچە.”
عەلاوی ھەروھا ئەشکەرە کربوو، ئیراق لگەل وەلاتێن ھەڤپەیمانیا ناڤدەولەتی گھشتیە رێکەفتنەکێ کو ل گۆری بەرنامەیەکا دەمکی یا دیارکری د سالێن 2025 و 2026 دە داوی ل ئەرکێن ھەڤپەیمانیێ بێ ئانین.
ل گۆری ھەمان رێکەفتنێ، ئەرکێن ھەڤپەیمانیا ناڤدەولەتی ل بارەگەھا شاندەیێ یا ل بەغدایێ و ل بارەگەھا عەین ئەسەد د مەھا ئیلۆنا 2025ێ دە بداوی دبن و قۆناغەکا نوویا ھەڤکاریا ئەولەھیێ د وارێ شێورمەندی و بھێزکرنا شیانێن ھێزێن ئەولەھیا ئیراقێ دە دەست پێ دکە.
